Бангладешийн гимнастикийн холбоо, Монголын гимнастикийн холбооны хооронд гимнастикийн спортын төрлүүдийг хөгжүүлэхэд хоёр улсын хооронд тогтсон найрсаг харилцаа, хамтын ажиллагааг хөгжүүлэх, бэхжүүлэх хамтын ажиллагааг эхлүүллээ.

        Азербайжан Улсын Баку хотноо болсон дэлхийн цомын аварга шалгаруулах тэмцээний үеэр Бангладешийн гимнастикийн холбооны ерөнхий нарийн бичгийн дарга Рахман Ахмедур, Монголын гимнастикийн холбооны ерөнхий нарийн бичгийн дарга бөгөөд гүйцэтгэх захирал Галбадрахын Ерөөлбат нар санамж бичигт гарын үсэг зурсныг энэ долоо хоногт баталгаажууллаа.

        Хамтын ажиллагааны хүрээнд цаашид олон ажлууд хийгээр төлөвлөж байгаа юм. Талууд гимнастикийн төрлүүдээр хамтарсан төсөл хөтөлбөр хэрэгжүүлэх, харилцан туршлага судлах, ур чадвар, арга техник, мэдээлэл, мэдлэг солилцож ажиллах боллоо.

       Тамирчид, гимнастикийн багуудын бэлтгэл, тэмцээний талаар, 2024 оны найм дугаар сард Монгол Улсын нийслэл Улаанбаатар хотноо зохион байгуулагдах “ЖИМСТРАДА-2024” олон улсын их наадамд оролцох, Гүйцэтгэх хороо, холбоодын удирдлагууд, мэргэжилтэн, техникч, спортын туслах ажилтан, дасгалжуулагчдын солилцооны хөтөлбөрийг хэрэгжүүлнэ.

    Спортын шинжлэх ухаан, боловсон хүчнийг бэлтгэх, солилцох, хавсаргах хөтөлбөрүүд болон спортын шинжлэх ухааныг хөгжүүлнэ. Дасгалжуулагчийн боловсрол, сургалт дасгалжуулалтын хөтөлбөр боловсруулах, спортын боловсрол, спортын менежмент, спортын дэд бүтцийн хөгжил, менежментийн чиглэлээр сургалт, солилцоо, хавсралтын хөтөлбөрүүдийг хамтран хөгжүүлэх юм байна.