Монголын гимнастикийн холбооны аэробик гимнастикийн, МУБИС-ийн Биеийн тамирын сургуулийн дэргэдэх “ГЕЙНЕР” клубийн тамирчин Б.Оргилболд, Б.Энхтөгс нар ОХУ-ын Екатеринбург хотноо гуравдугаар сарын 26 –аас дөрөвдүгээр сарын 1-ний өдрүүдэд зохион байгуулагдсан “Legends Challenge Games-2023” гимнастикийн наадамд оролцжээ.

            Энэхүү наадамд Армени, Алжир, Беларус, Израйл, Казакстан, Кипр, Киргиз, БНХАУ, Сири, Узбекстан, ОХУ-(36 муж) болон нийт 11 орны 2300 гаруй баг тамирчид насанд хүрэгчдийн ангиллаар өрсөлдсөн байна. Аэробик гимнастикийн насанд хүрэгчдийн ганцаарчилсан төрөлд эрэгтэй нэг, ганцаарчилсан эмэгтэй төрөлд нэг, хосын төрөлд нэг хос тамирчид оролцож медальт байранд шалгарлаа.

           Ганцаарчилсан эрэгтэй төрөлд: Б.Оргилболд – 18.950 оноогоор гуравдугаар байранд орж, хүрэл медаль авсан байна. Ганцаарчилсан эмэгтэй төрөлд: Б.Энхтөгс – 18.350 оноогоор мөн гуравдугаар байранд орж,  хүрэл медаль хүртжээ. Хосын төрөлд Б.Оргилболд, Б.Энхтөгс нар хүрэл медаль хүртсэн байна. Манай баг тамирчид ийнхүү гурван хүрэл медаль хүртсэн амжилттай тэмцээнээ өндөрлөлөө.