Азийн аварга шалгаруулах 3х3 сагсан бөмбөгийн тэмцээн гал гарсан тоглолтуудаар үзэгчдийн магнайг баясгалаа. Тус тэмцээн монголын эрэгтэй багийн ялалтаар өндөрлөлөө. Манай залуус аваргын төлөөх тоглолтод сүүлийн гурван тэмцээний босоо аварга Австралийг 21:18-аар буулгаж авсан тохиол болов. Онооны харьцаа 18:18 болсон эгзэгтэй мөчид А.Ананд алдаатай холын шидэлтээ оновчтой болгож, улмаар торгуулийн шидэлтээ цагаригт хийснээр багтаа ялалт авчирсан юм. Финалын тоглолтод Э.Дөлгөөн найман оноогоор багаа тэргүүлсэн бол А.Ананд зургаа, О.Энхбаатар тав, Д.Дэлгэрням хоёр оноо тус тус авлаа. Монголын шигшээ өмнө нь Австралитай хоёр удаа финалдаж, хоёуланд нь ялагдаад байсан бол хариугаа ийн авав. Хамгийн гол нь тивдээ түрүүлснээр Парисын олимпын эрхийн төлөөх тэмцээнд оролцох эрхээ авсан нь чухал байлаа. 

А.Ананд алдаатай холын шидэлтээ оновчтой болгож, улмаар торгуулийн шидэлтээ цагаригт хийснээр багтаа ялалт авчирсан юм

Сагсан бөмбөг монголд өндөр хурдацтай хөгжиж, олон залуус сагсан бөмбөгийн спортоор хичээллэж буй. Үүний үр дүнд Ази, тив дэлхийн томоохон тэмцээнд амжилт гаргаад байна. Тэр дундаа 3x3 сагсан бөмбөг монголд хамгийн сайн хөгжиж, залууст үлгэр дуурайллыг авчраад буй. Жинхэнэ сагсан бөмбөгөөс ялгаатай хамгийн том онцлог бол нэг самбарт тоглодог. Стандарт талбайн талыг аваад (5×5 сагсан бөмбөгт 15×28 метр) хурд, өрсөлдөөнийг нэмэхийн тулд бага зэрэг богиносгожээ.

Манай улсын баг тамирчид азийн дэвжээнд аархсан шиг аархаад ирлээ

          Бас нэгэн онцлог нь ойр, дундын зайнаас хийсэн гоол нэг оноо авдаг. Харин холын зай буюу 6,75 метрийн радиустай шугамын гаднаас  оруулахад ердөө хоёр оноотой. Том сагсан бөмбөгт гурван онооны шидэлт гэж ярьдаг бол энд холын шидэлт нь хоёр оноотой. Энэ бол маш том ялгаа юм. Учир нь их сагсан бөмбөгт холын зайн оноо жирийн гоолоос 1.5 дахин л их байгаа бол 3×3 төрөлд хоёр дахин их байгаа нь холоос оноо түүн, хөөн гүйцэх боломж олгодог. Бөмбөг нь ч өвөрмөц. Нэгдүгээрт хэлбэр нь өөр. Хоёрдугаарт, бага зэрэг жижиг. Өөрөөр хэлбэл их сагсан бөмбөгийн эмэгтэйчүүдийн тоглодог бөмбөгний хэмжээтэй. Гэхдээ жин нь 5×5 сагсан бөмбөгийн эрэгтэйчүүдийн бөмбөгтэй ижилхэн. Талбайн хучилт өөр. Задгай талбайд тоглоход тохирсон гудамжны шороо тоос, борооны усыг  шингээдэг тусгай бүрхүүлтэй байдгаараа онцлог байдаг. Монголчууд бидний хувьд удахгүй сагсан бөмбөгөөр олимпын аварга болохыг үгүйсгэхгүй билээ. Манай улсын баг тамирчид азийн дэвжээнд аархсан шиг аархаад ирлээ. Яг л үүн шигээ олон тэмцээнд амжилт гаргаж, төрийн дууллаа эгшиглүүлээрэй.