Сагсан бөмбөгийн 3х3-ын  Азийн аварга шалгаруулах тэмцээнд өрсөлдөж байгаа Монголын эрэгтэй баг хагас шигшээд далайн орнуудын төлөөлөл Шинэ Зеландын багийг хүнд тулааны эцэст 19:18-аар хожиж, аваргын төлөө өрсөлдөхөөр шалгаран үлдлээ. Монголын баг ийнхүү дөрөв дэх удаагаа тивийн аваргын шигшээд шалгарч байна.

         Манай өрсөлдөгч Шинэ Зеланд тивийн чансааны долоод эрэмбэтэй, Азийн аваргаас хошой мөнгөн медаль (2017, 2022) амжилттай баг байв. Хоёр баг өмнө нь 2017 онд Улаанбаатар хотноо болсон Азийн аваргын финалд таарч, манай баг 19:14-өөр хожсон. Энэ удаа манайхан эсрэг багийн намхан тоглогчийг олзлон авч, түүний эсрэг тоглох тактик хэрэглэсэн нь үр дүнгээ өгч байв.

       Энэ тоглолтод Д.Дэлгэрням долоон оноогоор багаа тэргүүлсэн бол Э.Дөлгөөн зургаа, А.Ананд, О.Энхбаатар нар гурван оноо тус тус авлаа. Одоо Монголын шигшээ 19:45 цагаас Австралитай Ази тивийн аваргын төлөө тоглох болно.