Сагсан бөмбөгийн 3х3-ын Азийн аварга шалгаруулах тэмцээнд өрсөлдөж буй манай эмэгтэй шигшээ эхний тоглолтоо далайн орнуудын төлөөлөл Шинэ Зеландын эсрэг хийлээ. Манай өрсөлдөгч Шинэ Зеланд 2018 оны тивийн аваргад түрүүлсэн хүчирхэг баг байв. Нурууны хувьд ч хавьгүй өндөр юм.

           Тоглолтыг Шинэ Зеланд 8:0 гэж эхлүүлсэн бөгөөд үүнээс хойш Монголын баг оноог нөхөж, нэлээд ойртуулсан. Гэвч эцсийн дүндээ 17:10-аар ялагдлаа. М.Цэрэнлхам дөрвөн оноо, зургаан самбараар багаа тэргүүлжээ. Б.Ариунцэцэг мөн дөрвөн оноо авсан аж. Түүнчлэн Токиогийн олимпын монголын багийн тугч О.Хулан хоёр оноо, таван самбар авснаас гадна хамгаалалтад тун сайн байв.

        Тоглолтын цаг дуусахын өмнөхөн Ц.Болорцэцэг шагайгаа эвгүй гишгэн талбайг чөлөөлсөн байна. Энэ нь манай багийн хувьд том хүндрэл боллоо. Хэрэв түүний гэмтэл ноцтой байвал дараагийн тоглолтоо сэлгээгүйгээр хийх хүндхэн даалгавар хүлээж байгаа юм. Манай баг орой 20:45 цагаас Малайзын эсрэг хэсгээс хэн нь шалгарахаа шийдэх чухал тоглолтыг хийх болно.