Турк Улсын Анаталья хотод болж буй жүдо бөхийн “Их дуулга” тэмцээний эхний өдрийн барилдаан өчигдөр боллоо. Эмэгтэйчүүдийн 48 кг-ын жинд 40 бөх барилдсан. Манай улсаас тус жинд ОУХМ.Бавуудоржийн Баасанхүү, ОУХМ Ганбаатарын Наранцэцэг нар хүч сорьсон юм. Тэд сугалаагаар “С” хэсэгт хоёулаа орсон.

           Г.Наранцэцэг эхний тойрогт гоц мөргөн ялалт авав. Хоёрдугаар тойрогт Испанийн бөх Eva Solar Ferez-ийг, гуравдугаар тойрогт Туркийн тамирчин  Merve Azak-ыг ялсан. “С” хэсгийнхээ аваргын төлөө Б.Баасанхүүтэй барилдаж гурван торгуулиар хожигдсон. Дагах барилдаанд Өмнөд Африкийн Geronay Whitebooi-ийг ялж, хүрэл медалийн төлөөх барилдаанд  Германы Katharina Menz-ийг хожиж хүрэл медаль авсан.

          Харин ОУХМ Б.Баасанхүү эхний тойрогт гоц мөргөн ялалт авсан. Хоёрдугаар тойрогт Хятадын Zongying Guo-г, гуравдугаар тойрогт Бразилийн Natasha Ferreira-г, “С” хэсгийн аваргын төлөөх барилдаанд Г.Наранцэцэгийг хожсон. Шөвгийн дөрөвт Францын Blandine Pont-д хожигдсон. Хүрэл медалийн барилдаанд Бразилийн Amanda Lima-г ялж хүрэл медаль хүртлээ.