Гүрж Улсын нийслэл Тбилис хотод жүдо бөхийн  их дуулга тэмцээн өндөрлөв. Манай жүдочид Тбилисийн их дуулгыг нэг алт, хоёр мөнгө, нэг хүрэл, нэг шагналт тавдугаар байртайгаар багийн дүнгээр 61 орноос гуравдугаарт бичигдсэн сайхан амжилттайгаар өндөрлүүлж байна.

      Б.Гочигсүрэн тэмцээний сүүлийн өдөр -100 кг-ын жингийн аваргын төлөө дэвжээний эзэн орны бөх Илиа Суламанидзетай барилдаж вазари үнэлгээ алдаж, мөнгөн медаль хүртлээ. Манай бөхийн авсан вазари үнэлгээг шүүгч нар цуцлаагүй бол барилдаан өөрөөр эргэх байв. Харин эмэгтэйчүүдийн +78 кг-ын жинд А.Амарсайхан хүрэл медалийн төлөөх барилдаан Хятадын бөх Ху Шяанд хожигдон тавдугаар байрт орлоо.

      Сүүлийн үеийн их дуулгуудаас харахад ОУХМ Б.Гончигсүрэн, Г.Алтанбагана, Б.Эрдэнэбаяр, Б.Эрхэмбаяр нарын бөхчүүдийн бэлтгэл жигдэрсэн, бяртай сайхан байгаа нь харагдаж байлаа. Дараа долоо хоногт  энэ сарын 30-аас ирэх сарын 2-ны өдрүүдэд Турк Улсын Анталяа хотноо их дуулга тэмцээн болно. Манайхаас одоогоор эрэгтэй 10, эмэгтэй есөн тамирчин мэдүүлгээ өгсөн байгаа.