Японы мэргэжлийн сүмо бөхийн хаврын тэмцээн харү башё гуравдугаар сарын 12-26-ны өдрүүдэд Осака хотод боллоо. Сэкивакэ цолтой анхны тэмцээндээ зодоглосон монгол сүмоч Кирибияма Бямбачулууны Лхагвасүрэн сүүлийн өдөр комүсүби Дайэйшог унагаснаар нэмэлт барилдаан гарсан.

        Улмаар нэмэлт барилдаанд түүнийг дахин давснаар шинэ цолоо ч мялааж 12 даваа, гурван унаатайгаар Японы эзэн хааны цомыг анх удаагаа гардан авлаа. Тэрбээр дээд зиндаанд түрүүлсэн Монгол Улсын ес дэх сүмочин болж байна. Түүнээс өмнө Асашёорюү, Хакүхо, Харүмафүжи, Кёкүтэнхо, Какирюү, Тэрүнофүжи, Тамаваши, Ичиножёо нар Япон Улсын эзэн хааны цом гардаж байв.