МҮОХ-ны гишүүдийн ээлжит хурал “Корпорейт” зочид буудлын их танхимд боллоо. Хуралд 180 гишүүн ирэх ёстойгоос 108 нь хүрэлцэн ирж, 60 xувийн ирцтэйгээр эхэлсэн байна. МҮОХ-ны ерөнхийлөгч Б.Баттүшиг хурлыг нээж хэлсэн үгэндээ 2023 онд монголын тамирчдыг олон тэмцээн, олон том наадмууд хүлээж байгааг дурдаад, эдгээр тэмцээнд амжилт гаргахад МҮОХ-ны нийт гишүүдийн үүрэг оролцоо чухал болохыг онцлов.

       Хурлын эхэнд гишүүнчлэлийн асуудлыг хэлэлцэж, олонхын саналаар крикет болон люж чарганы холбоог МҮОХ-ны гишүүн байгууллагаар элсүүлэхийг дэмжлээ. МҮОХ-ны ерөнхий нарийн бичгийн дарга Э.Бадар-Ууган өнгөрсөн нэг жилийн үйл ажиллагааны тайланг танилцуулсан бол тэргүүн дэд ерөнхийлөгч Ч.Наранбаатар төлөвлөгөө, төсвийг хэлэлцүүлж батлууллаа. Мөн хурлын үеэр МҮОХ-ны Хянан шалгах зөвлөл мэдээлэл хийснээс гадна нийт гишүүдийн олонхын саналаар МҮОХ-ны дүрмийн зарим зүйл, заалтад нэмэлт, өөрчлөлт орууллаа.