Монгол Улсын байт харвааны 15 дахь удаагийн заалны улсын аварга шалгаруулах тэмцээн өнөөдөр Орхон аймагт эхэллээ. Тэмцээнийг Орхон аймгийн Засаг даргын Тамгын газар, Монголын байт харвааны холбоо хамтран зохион байгуулж байна. Тэмцээнд нийт 20 гаруй байгууллага клубийн 303 тамирчин өрсөлдөж байгаа бөгөөд Орхон аймгаас 79 тамирчин оролцож байгаа юм.

            Байт харвааны заалны Улсын аварга шалгаруулах тэмцээн рекувр болон компаунд төрлөөр  U14, U18, U21, насанд хүрэгчид гэсэн ангилалд болж явагдана. Тамирчид “Рекувр” төрөлд ангилал тус бүрт эрэгтэй, эмэгтэй хувийн харваа, багийн харваа, холимог багийн харваагаар өрсөлдөнө.

         Харин “Компаунд” төрөлд эрэгтэй, эмэгтэй хувийн харваа, эрэгтэй багийн харваа ангиллаар өрсөлдөж, цэц мэргэнээ сорих юм. Дашрамд дурдахад 2022 оны ЗУАШТ-д байгууллагын дүнгээр Хангарьд клуб алтан медаль, Алдар спорт хороо мөнгөн медаль, Орхон аймгийн баг тамирчид хүрэл медаль хүртэж байжээ.