Сонирхогчдын боксын эмэгтэйчүүдийн ДАШТ-ий долоо дахь өдөр 2021, 2022 оны насанд хүрэгчдийн Азийн аварга шалгаруулах тэмцээний хүрэл медальт, Үндэсний шигшээ баг “Аврагч” спорт хорооны тамирчин ОУХМ Лутсайханы Алтанцэцэг 48 кг-ын жингийн дөрөвний нэг шигшээ тулаанаа хийв.

          Тэрбээр Узбекистаны Фарзона Фозиловатай тулалдаж 5:0-ээр хүрэл медалийн болзол хангалаа. Өдгөө 28 настай тэрбээр ийнхүү ДАШТ-д тав дахь оролдлогоороо дэлхийн медальтан болж байна. Л.Алтанцэцэг өнөөдөр хагас шигшээд Мароккогийн Ясмин Моуттаки, Болгарын Юлианова Асенова нарын ялсантай тулалдана.

           Л.Алтанцэцэг Монголын эмэгтэй боксчдоос дэлхийн медальтан болж буй хоёр дахь тамирчин болж байна. Түүнээс өмнө нь гавьяат тамирчин Мягмардуламын Нандинцэцэг 2018 онд мөн л Шинэ Делигийн рингэнээс анхны медалийг авч байсан юм.