Нийслэлийн Биеийн тамир, спортын газраас жил бүр уламжлал болгон зохион байгуулдаг сургуулийн өмнөх боловсролын байгууллагын биеийн тамирын багш, арга зүйчдийн сургалтыг Монголын Гимнастикийн холбоотой хамтран энэ сарын 21-23-ны өдрүүдэд зохион байгуулж байна.

     Энэхүү сургалтын гол зорилго нь Монгол Улсын Биеийн тамир, спортын тухай хууль, Нийслэлийн Засаг даргын 2020-2024 оны үйл ажиллагааны хөтөлбөр, Нийслэлийг 2023 онд хөгжүүлэх үндсэн чиглэлийг тус тус хэрэгжүүлэх, сургуулийн өмнөх боловсролын байгууллагын биеийн тамирын багш, арга зүйчдийн мэдлэг ур чадварыг дээшлүүлэх чиглэлээр мэдээ мэдээлэл өгөх явдал юм.

   Онолын хичээлийг Нийслэлийн Биеийн тамир, спортын газрын Спорт, нийтийн биеийн тамирын хэлтсийн ахлах мэргэжилтэн, боловсролын магистр Э.Мөнх-Эрдэнэ “Нийслэлийн Биеийн тамир, спортын газраас 2023 онд хэрэгжүүлэх биеийн тамир, спортын арга хэмжээний танилцуулга”, “Улаанбаатар-2023” Зүүн Азийн залуучуудын наадмыг зохион байгуулах хороо ХХК-ний ахлах мэргэжилтэн З.Сүхчулуун “Улаанбаатар 2023” Зүүн Азийн залуучуудын наадмын танилцуулга”-ыг талаар мэдээлэл өгөв. Мөн Монголын гимнастикийн холбооноос томилогдсон багш Б.Болормаа (МГХ-ны ЕНБД-ын мэдээлэл) “Уран сайхны гимнастикийн хот, улсын аварга шалгаруулах тэмцээний заавал хийх дасгалын танилцуулга” сэдвээр мэдээлэл хийсэн юм.

       Монголын гимнастикийн холбооноос томилогдсон багш Д.Түмэнтөгс, Ж.Чулуунцэцэг нар “Цэцэрлэгийн хүүхдийн уран хөдөлгөөнт гимнастикийн тэмцээний заавал хийх дасгалын мэдээлэл” зэрэг сэдвүүдээр хичээл заалаа. Харин Нийслэлийн Засаг захиргааны V байрны “Иргэний танхим”-д зохион байгуулсан уг сургалт семинарын онолын хичээлд Улаанбаатар хотын есөн дүүргийн 300 гаруй цэцэрлэгийн 400 гаруй багш нар хамрагдлаа.

    Сургалтын дадлага хичээл Чингэлтэй болон Баянгол дүүргийн Биеийн тамир, спортын хороодын Спорт цогцолборт гурав хоног явагдана. Монголын Гимнастикийн холбооноос сургалтад хамрагдсан багш нарт “Сертификат” олгоно.