Энэ өдөр Монгол Улсын Ардын багш,  чөлөөт бөхийн гавьяат тамирчин, гавьяат  дасгалжуулагч Чимидбазарын Дамдиншаравын төрсөн өдөр тохиож байна. Ардын багш Ч.Дамдиншарав 1945 оны гуравдугаар сарын 21-ний өдөр Өвөрхангай аймгийн Гучин-Ус суманд мэндэлжээ. Тэрбээр 1968 онд Мексик Улсын Мехико хотноо болсон зуны XIX  олимпын их наадмаас Монгол Улсын анхны хүрэл медалийг, чөлөөт бөхийн  52 кг-ын жинд хүртсэн юм.

        Ийнхүү Ч.Дамдиншарав багш шинэ үеийн Монголын спортын түүхэнд анхдагчийн нэг нь болсон. Хүн төрөлхтний спортын дээд баяр, олимпын наадмын медалийг улсынхаа олон зуун тамирчдын дундаас анх авчирсан гавьяатан яах аргагүй мөн. Монгол Улсын самбо, жүдо бөхийн нэрт зүтгэлтэн, Монгол Улсын Ардын багш, гавъяат дасгалжуулагч Ч.Насантогтох багш бол түүний төрсөн дүү нь юм.

        Олон зуун шавь нар нь түүнийг Данийл багш гэж хүндэлнэ. Ч.Дамдиншарав багшийг Чөлөөт бөхийн Улсын шигшээ багийг удирдаж байхад шавь  Д.Оюунболд нь дэлхийн аваргаас хүрэл, Б.Болд хошой мөнгө, Н.Бүргэдаа хүрэл, З.Дүвчин мөнгө, А.Энхээ мөнгө, хүрэл,  Лу.Энхбаяр хүрэл медаль хүртэж байв. Ж.Даваажав, Д.Оюунболд нар Москвагийн олимпоос мөнгө, хүрэл медаль хүртэж байлаа. Энэ бол Данийл багшийн үеийн амжилтын зөвхөн эхлэл нь юм.