Монголын хөлбөмбөгийн холбооны 21 аймгийн Футзалын 14 болон 16 насны хөвгүүдийн цомын тэмцээн хоёрдугаар сарын 27-ноос гуравдугаар сарын 5-ны өдөр хүртэл амжилттай явагдаж өндөрлөлөө. Энэ удаагийн тэмцээнд 15 аймгийн 250 гаруй тоглогч өрсөлдөж аварга багуудаа тодруулсан юм.

           Тус тэмцээнд бусдаасаа манлайлсан шилдгүүдийг тодруулахад 14 хүртэлх насны ангилалд шилдэг хаалгачаар Э.Амаржаргал /Дархан-Уул/, мэргэн буучаар есөн гоол оруулсан З.Мөнгөншагай /Орхон/, тоглогчоор Г.Тэмүүлэн /Дархан-Уул/ нар тодорсон.

       Харин 16 хүртэлх насны ангилалд шилдэг хаалгачаар Б.Ган-Очир /Сэлэнгэ/, мэргэн буучаар 15 гоол оруулсан Б.Далайбат /Сэлэнгэ/, тоглогчоор Г.Ганбаяр /Орхон/ тус тус тодорлоо. Энэ удаагийн 21 аймгийн футзалын хөвгүүдийн цомын медальт байруудад 14 хүртэлх насны ангилалд хүрэл медалийг М.Сэргэлэн дасгалжуулагчтай Орхон аймаг, мөнгөн медалийг Б.Буянтогтох дасгалжуулагчтай Говьсүмбэр аймаг, аваргын алтан медаль цомын эздээр Ч.Гантөмөр дасгалжуулагчтай Дархан-Уул аймгийн шигшээ тодорч аварга болсон.

      Харин 16 хүртэлх насны ангилалд хүрэл медалийг Б.Билгүүн дасгалжуулагчтай Дархан-Уул аймаг, мөнгөн медалийг Б.Ганцогт дасгалжуулагчтай Сэлэнгэ аймаг, аваргын алтан медаль, цомын эздээр Орхон аймгийн шигшээ баг тодорсон юм.