Монгол Улсын Хөдөлмөрийн баатар, гавьяат тамирчин, дархан аварга, олимпын мөнгөн медальт Жигжидийн Мөнхбат, Монгол Улсын аварга Дагвацэрэнгийн Хадбаатар нарын гэр бүл, Монгол Улсын дархан аварга, гавьяат тамирчин Агваансамдангийн Сүхбат нарт Төв аймгийн нутгийн удирдлагын байгууллагаас хүндэтгэл үзүүллээ.

       Төв аймаг байгуулагдсаны түүхт 100 жилийн ойд зориулсан Төв түмний золголт арга хэмжээний хүрээнд 1963, 1964, 1965, 1966, 1967, 1974 оны Улсын их баяр наадамд түрүүлж, 1972, 1975, 1978, 1980 онуудад үзүүрлэн нийт 23 удаа шөвгөрч, цагаан сарын барилдаанд зургаан удаа түрүүлэн, дөрвөн удаа үзүүрлэж, 1968 онд олимпын их наадмаас чөлөөт бөхийн төрөлд мөнгөн медаль, 1967 онд ДАШТ-ээс анхны хүрэл медалийг эх орондоо авчирсан домогт аварга Жигжидийн Мөнхбат билээ.

        Улсын их баяр наадамд 1976, 1986 онуудад түрүүлж, 1979, 1983, 1985 онуудад үзүүэрлэн 11 удаа шөвгөрч, 1980, 1984, 1985 оны цагаан сарын барилдаанд түрүүлсэн, самбо бөхийн ОУХМ, ховор заяах арал жинтэй, эгнэшгүй хүчтэй аварга Дагвацэрэнгийн Хадбаатар юм.

       Угсраа мэх, уран хурц барилдаанаараа ард олноо "жижиг" хэмээн алдаршсан, 2000, 2001, 2004 оны үндэсний их баяр наадамд түрүүлэн 1993, 1997, 1998, 1999, 2000, 2001, 2002, 2003, 2004, 2005, 2006 онуудад шөвгөрч, цагаан сарын барилдаанд хоёр түрүүлэн, нэг удаа үзүүрлэж, үндэсний бөхийн оргилд хүрч дархан аварга цол хүртэж, ард түмэндээ хүндлэгдсэн идэр залуу, их хүчтэн бол Агваансамдангийн Сүхбат  яах аргагүй мөн.