Сагсан бөмбөгийн 2025 оны Азийн Аварга шалгаруулах тэмцээний урьдчилсан шатанд оролцох эрхийн төлөөх тоглолт боллоо. Монгол Улсын шигшээ баг “UG Arena”-д болсон эхний тоглолтод Хонконгийн багийг 76:69-ээр, хоёр дахь тоглолтод Сингапур Улсын шигшээ багийг 73:49-ийн харьцаатай хожсоноор 2025 оны Азийн Аварга шалгаруулах тэмцээний урьдчилсан шатанд оролцох эрхээ албан ёсоор авч өөрсдийнхөө статусыг бататган харууллаа.

            Өнгөрсөн 2022 оны арваннэгдүгээр сард Азийн Аваргын урьдчилсан нэгдүгээр шатны эхний тоглолтоо хийж байсан “Хөх Чоно”-ууд төдийгөөс өдий хүртэл гайхалтай тоглосоор одоо Азийн Аваргын урьдчилсан шатанд оролцох эрхээ албан ёсоор авсан долоо дахь улс болж байна. Тэмцээний “F” хэсгээс Гуам, Тайланд, Монгол Улсын шигшээ багууд дараагийн шат руу орохоор болоод байгаа бөгөөд үлдсэн тоглолтуудаас хамаарч дараагийн шат руу орох нэг улсын нэр тодрох юм.