Манай улсын 66 кг-ын жингийн шилдэг жүдочдын нэг, их дуулга тэмцээний аварга ОУХМ Ганболдын Хэрлэн энэ өдөр мэндэлжээ. Тэрбээр Сэлэнгэ аймагт төрсөн хэдий ч Дархан-Уул аймагт өсөж, сурч боловсрон, ОУХМ Г.Батбилэг багшаар жүдогийн эрдмийг заалган жүдогийн татамид хөл тавьж, дэлхийд данстай жүдоч болж чадсан билээ. Г.Хэрлэн Тайванийн Тайпейгийн нээлттэй тэмцээний 60 кг-ын жинд түрүүлэн олон улсын тэмцээний анхны гараагаа амжилттай эхлүүлж байлаа.

      Тэрбээр 60 кг-ын жинд барилддаг байхдаа гран при, гранд слам тэмцээнээс ганзага хоосон ирсэн удаа цөөхөн. Г.Хэрлэн дэлхийн аварга Г.Болдбаатар, дэлхийн аварга Ц.Цогтбаатар, дэлхийн аваргын мөнгөн медаль Д.Амартүвшин, залуучуудын дэлхийн аваргын хошой мөнгөн медальт Д.Төмөрхүлэг, дэлхийн цомын аварга Ч.Болдбаатар нарын гол өрсөлдөгч нь байв. Тэрбээр дэлхийн цом, гран при, слам, “Мастерс” гээд оролцсон тэмцээн болгоноосоо хүрэл медаль хүртдэг байв. Тийм ч учраас түүнийг “Хүрэл Хэрлэн” хэмээн нэрлэж байсан нь бий. Харин 66 кг-ын жин рүү өгсөж гранд сламын аварга болж байлаа.