Монголын боксын эмэгтэйчүүдийн Үндэсний шигшээ баг, “Хангарьд” спорт хорооны тамирчин, ОУХМ, дэлхийн цомын аварга, залуучууд, насанд хүрэгчдийн Ази тивийн аварга шалгаруулах тэмцээний хүрэл медальт Эрдэнэдалайгийн Мичидмаатай ярилцлаа. Тэрбээр саяхан болж өнгөрсөн  насанд хүрэгчдийн 2023 оны УАШТ-ээс мөнгөн медаль хүртсэн юм.

       -Энэ 2023 оны насанд хүрэгчдийн УАШТ-д амжилттай оролцож мөнгөн медаль хүртсэнд баяр хүргэе. Улсын аваргын финалын тулааныг өөрийн хүссэн хэмжээнд хүртэл хийж чадав уу?

        -Баярлалаа. Улсын аварга шалгаруулах тэмцээний финалын тулааныг 22 хүртэлх насны Ази тивийн аварга, дэлхийн цомын тэмцээний аварга найз Энхжаргалтайгаа хийсэн. Энэ тулаанд би шүүгчдийн 3:2-ын харьцаатай саналаар ялагдал хүлээсэн байгаа. Бид хэн хэнийхээ тулааны арга барилыг мэдэх болохоор бидний өрсөлдөөн эн тэнцүүхэн боллоо. Миний хувьд өөрийн хүссэн хэмжээндээ, өөрт байгаа ур чадвараа гарган тулалдаж чадсангүй.

-Өмнөх жил, 2022 оны УАШТ-ий финалд О.Есүгэнд шүүгчдийн саналаар бас л ялагдаж мөнгөн медаль хүртэж байсан байх аа?

           -Харин тийм ээ. 2022 оны улсын аварга шалгаруулах тэмцээний аваргын төлөөх тулаанд мөн л шүүгчдийн 3:2 гэсэн саналаар ялагдал хүлээж байлаа.

-Энэ жилийн УАШТ-ий бэлтгэл, сургуулилалт хэр таарав.  Жин өгсөж тулаан хийсэн юм уу?

         -Энэ жилийн улсын аваргын өмнө бид шигшээ багийн 13 тамирчин, гурван дасгалжуулагчийн бүрэлдэхүүнтэй Казахстан Улсад очиж бэлтгэл хийсэн. Улсын аварга шалгаруулах тэмцээнд жингийн найз О.Есүгэн доод жин рүү хасаж, харин би үндсэн жин 54 кг-ын жиндээ тулалдсан.

-Насанд хүрэгчдийн УАШТ-ээс хэд дэх медалиа хүртэв ээ?

          -Насанд хүрэгчдийн улсын аварга шалгаруулах тэмцээнээс энэ жил  тав дахь медалиа хүртэж байна.

-Энэ жилийн УАШТ-ий онцлог юу байсан бэ?

           -Энэ жилийн улсын аварга шалгаруулах тэмцээн олимпын өмнөх жилийн улсын аварга гэдгээрээ илүү өрсөлдөөнтэй болсон. Үзэгчид ч их байлаа. Мөн энэ улсын аваргаас шинээр тамирчдыг сонгож, шигшээ багаа бүрдүүлнэ гэж байсан.

-Шинэ оны өмнө Герман Улсын Кёльн хотноо болсон боксын дэлхийн цомын аварга шалгаруулах тэмцээний 54 кг-ын жинд түрүүлж, алтан медаль хүртэж “Шилдэг техниктэй тамирчин”-ий шагналыг хүртсэн гэв үү?

       -Тийм ээ. Оны өмнө арваннэгдүгээр сард Герман Улсад зохиогдсон дэлхийн цомын тэмцээнд өөрийн үндсэн 54 кг-ын жиндээ  амжилттай тулалдаж, хүсэл мөрөөдлийнхөө нэг хэсгийг биелүүлсэндээ баяртай байгаа.

-Дэлхийн цомд хэдэн тулаан хийв. М.Энхжаргал, Г.Бадмаараг та гурав дэлхийн цомын аварга болсон юм уу?

-Дэлхийн цомд эхний тулаан дээрээ гоц мөргөж гарч ирсэн. Харин хагас финалд Казахстан Улсын тамирчинтай тулалдаж ялсан. Улмаар финалийн тулааныг Украин Улсын тамирчинтай хийж ялалт байгуулж, дэлхийн аварга болж алтан медаль хүртсэн. Энэ удаагийн дэлхийн цомын тэмцээнээс манай охидууд гурван алт, нэг хүрэл медаль хүртэж түүхэн амжилт гаргасан байгаа.

-Миний дүү өөрийгөө танилцуулахгүй юу. Эрдэнэтийн “Хангарьд” спорт хорооноос тамирчин болох гараагаа эхлүүлсэн гэв үү?

           -Миний хувьд анх Орхон аймгийн “Эрдэнэт бокс” клуб дээр спортын мастер Б. Пүрэв-Очир багшийн шавь болж боксын гараагаа эхлүүлж байлаа.  2018 онд боксын Үндэсний шигшээ багт орж,  2022 оноос хойш “Хангарьд” спорт хороогоор овоглон явж байна.

-Боксын ОУХМ Монхорын Намуун найз тань, боксын спорт руу өөрийг чинь оруулж өгсөн юм уу?

               -М.Намуун бид хоёр арван жилийн нэг ангийн найзууд. Оюутан болоод ч  хүртэл нэг ангид байлаа. Одоо ч хамт даа. Анх боксын багш маань манай сургууль дээр элсэлт аваад явж байхад М. Намуун эхэлж бүртгүүлээд очиж бэлтгэл хийсэн юм. Маргааш нь намайг хамт явъя гэж гуйсан. Тэгээд л хамтдаа боксын спорт руу орсон доо.

-Үнэхээр өөрийн тань сонирхсон спорт бокс мөн байв уу. Найз М.Намууныхаа ятгалгаар боксын спортыг сонгосон уу?

        -Би айлын ганц охин болохоор зодоон нүдээнээс хол жижигхэн, турьхан охин байлаа. Харин найз М.Намууныг дагаж бэлтгэл хийгээд боксын энэ спортод гүн гүнзий орчихсон юм.

-Бэлтгэл, сургуулилалтаа аль клуб дээр хийж байгаа вэ Хэн багшийн шавь бэ Өдөрт хэдэн цагийн бэлтгэл хийдэг вэ?

            -Бэлтгэл сургуулилалтаа Үндэсний шигшээ баг дээр хийдэг. Миний анхны багш гэвэл спортын мастер Б. Пүрэв-Очир байгаа юм. Өдөрт ерөнхийдөө 2-3 цагийн бэлтгэл хийж байгаа. Том тэмцээний өмнө бэлтгэл, цугларалтад гарч өдрийн 4-5 цаг бэлтгэл хийдэг.

-Олимп, дэлхийн аваргаас бусад тэмцээнээс медаль хүртэж үзлээ. Өөрийнхөө гаргасан амжилтуудаа танилцуулахгүй юу?

               -Залуучуудын Ази тивийн аваргаас хүрэл медаль хүртсэн. Насанд хүрэгчдийн Ази тивийн аваргын хүрэл медальтай. Дэлхийн цомын тэмцээний алт, хүрэл медальтай. Дэлхийн цомын “Шилдэг техниктэй эмэгтэй тамирчин”-ы шагналыг хүртэж байлаа. Олон улсын тэмцээнүүдийн алт, мөнгө, хүрэл медаль медальтай.

-Улсын аваргаас алтан медаль хүртэж чадсангүй. Дэлхийн аварга шалгаруулах тэмцээний өмнө сорил хийх үү. ДАШТ-д 54 кг-ын жиндээ тулалдах боломж бий юу?

             -Энэ жилийн эмэгтэйчүүдийн дэлхийн аварга шалгаруулах тэмцээн болоход яг нэг сарын хугацаа үлдсэн байна. Тийм учраас ямар нэгэн сорил тэмцээн байхгүй байх. Би 54 кг-ын жиндээ тулалдах бүрэн боломжтой байна. Харин дэлхийн аварга шалгаруулах тэмцээнд оролцох тамирчдын нэрс одоогоор гараагүй байгаа.

-Ирэх жил Парисын олимп болно. Олимпын эрхийн ямар тэмцээнүүд хүлээж байгаа вэ?

            -Дэлхийн аварга шалгаруулах тэмцээний дараа олимпын эрхийн хамгийн эхний тэмцээн ирэх есдүгээр сард зохиогдох Азийн наадам байгаа.