Монголын бүх ард түмний спортын өвлийн XVI наадам, Монголын хүүхдийн спортын өвлийн VII наадам Орхон аймаг, Эрдэнэт хотод гурав дахь өдрөө амжилттай үргэлжилж байна. Өвлийн спортын наадмын шайбтай хоккейн тэмцээн Орос 19 дүгээр сургуулийн гадна талбайд болж байгаа юм. Монголын Бүх ард түмний спортын өвлийн XVI наадмын шайбтай хоккейн эхний тоглолтод Орхон аймгийн “Хангарьд баг”, Баянгол дүүргийн “Баянгол” багууд таарч 22:1 харьцаатай “Хангарьд” баг яллаа.

         Орхон аймгийн шайбтай хоккейн “Хангарьд” баг 20 тамирчны бүрэлдэхүүнтэй өвлийн спортын наадамд оролцож байна. Орон нутагтаа зохион байгуулж буй өвлийн спортын наадамд амжилт үзүүлж аваргын цомоо хамгаалах зорилготой байгаа талаар “Хангарьд” спорт клубийн хоккейн шигшээ багийн ахлагч Б.Эрдэнэсүх онцолжээ. Мөн тэмцээнд оролцож буй баг тамирчид, дасгалжуулагч, шүүгчид тэмцээний зохион байгуулалт сайн байгааг хэллээ.

         Монголын Бүх ард түмний спортын өвлийн XVI наадмын шайбтай хоккейн тэмцээнд зургаан аймгийн тамирчид оролцож байна. Тухайн зургаан баг тойргоор тоглож аваргаа шалгаруулна. “Нөхөрлөл, тэмүүлэл, амжилт” уриатай Монголын бүх ард түмний спортын өвлийн XVI наадам, Монголын хүүхдийн спортын өвлийн VII наадам энэ сарын 13-ны өдрийг дуустал Орхон аймагт болно.