Залуу үетэй эд хаваа үзэлцэж, давсан бөхөө түшиж босгоод, тахим авч, өгч байгаа нь гэж маяг аа маяг. “Харьж яваа” гээд бөхөд хайртай олны тоохоо байсан бөхчүүдийг төлөөлж, тэргүүлээд заалны барилдаан ч алгассангүй. Тэр бүрдээ уран, сайхан барилдаанаа илүү харуулж, үзэгч олноо цэнгүүлж байна даа, Архангайн хүчит арслан Р.Пүрэвдагва.

                                       Р.Пүрэвдагва арслан 37-той бөх гэхэд залуучуудтайгаа сайхан үзэж байна. Саяхан л гэхэд Ерөнхийлөгчийн нэрэмжит чансаа өндөр 128 бөхийн барилдаанд үзэгч олондоо хүндэтгэл үзүүлээд төрийн төлөөлөлд хүндэтгэл үзүүлээгүй хэмээн олон нийтийг шуугиулаад байсан арслан өнгөрсөн даваа гарагт болсон харцага цолонд хүндэтгэл үзүүлэх улс, аймгийн алдар цолтой 256 бөхийн барилдаанаар дахиад л бөхөд хайртай түмнээ баясгалаа. Давсан давааны хишгээ хүндэтгэлийн барилдаанаа үзэхээр ирсэн ахмад харцагууд руу барьж гүйгээд л. Залуустай ч ана мана үзээд, өмсөж, хонгодох нь бүр л уран болжээ.

Өнгөрсөн амралтын өдөр болсон “Алтан цом”-ын барилдаанд Р.Пүрэвдагва арслан сэлгээнээс гарч ирээд мөн ч сайхан барилдаан үзүүлэв. Угаас ч сүүлийн үед заалны барилдаан алгасахгүй байгаа Архангайн арслан бэлтгэл ханасан, мэх нь уран харагдана лээ. Сэлгээнээс ороод ид гарч ирж яваа улсын начин Т.Дүгэрдорж, Б.Чимэдвандан хоёрыг төвөггүйхэн өвдөг шороодуулах.  Давсан залуу начнуудаа өөрөө түшиж босгоод, аатай гэгч нь дэвж байх юм. Бөхөд хайртай түмэндээ хүндлэгдсэн жудагтай арслан Р.Пүрэвдагва гоёхон, уран ч байна даа.