Чөлөөт бөхийн энэ жилийн чансааны оноо олгох эхний тэмцээн Хорват Улсын нийслэл Загреб хотод үргэлжилж өндөрлөв. Загребийн дэвжээнд манай улсаас долоон тамирчин зодоглосноос нэг алт, хоёр мөнгө, нэг хүрэл медальтай эх орондоо ирэхээр болов.

         Эмэгтэйчүүдийн 53 кг-ын жинд “Токио-2020” олимпын наадам болон “Нур-Султан-2019” ДАШТ-ий хүрэл медальт Монгол Улсын гавьяат тамирчин Бат-Очирын Болортуяа мөнгөн медаль хүртлээ. Тэрбээр  АНУ-ын Алиша Ховкыг 11:0-ээр, Унгарын Вивьен Матейг 12:2-оор, Молдавын Юлия Леордаг 3:3-аар, Канадын Диана Мэри Вейкерийг цэвэр дарж шигшээд шалгарсан.

            Алтан медалийн төлөөх барилдаанд 110 барилдаанд дараалан ялалт аваад буй Японы” Залуу-Од” Акари Фүжинамитай анх удаа нүүр тулан барилдаж, оноогоор цэвэр 0:10-аар ялагдснаар үзүүрлэв. Б.Болортуяа гавьяат “Ranking Series” тэмцээнд гурав дахиа финалдсан бөгөөд өнгөрсөн жил Яшар Догу, Болат Турлыхановын нэрэмжит тэмцээнээс алтан медальтай ирж байсан билээ.