Монголын гимнастикийн холбооны спортын гимнастикийн эрэгтэй, эмэгтэй баг тамирчид ОХУ-ын Благовешенск  хотноо энэ сарын 24-28 -ны өдрүүдэд “БЛАГОВЕЩЕНСК” хотын захирагчийн нэрэмжит 23 дахь удаагийн олон улсын тэмцээнд амжилттай оролцлоо. Баг тамирчдын дасгалжуулагч багшаар ОУХМ Б.Мөнхсайхан ажиллажээ.

         Энэ удаагийн тэмцээнд Монгол, ОХУ-ын Владивосток, Благовещенск, Чита, Хабаровск, Райчихинск, Комсомольск, Биробиджаны нийт хоёр орны 12 багийн 130 гаруй тамирчид өсвөр нас, насанд хүрэгчдийн ангилалд өрсөлдсөн байна. Манай улсаас эрэгтэй гурав, эмэгтэй хоёр тамирчин оролцсон байна.

         Хэрэглэл тус бүрийн амжилтаас дурдвал нэгдүгээр зэргийн ангилалд З.Тэнгис нийлбэр дүнгээр долдугаар байрт шалгарчээ. Харайлтын төрөлд хүрэл медаль, бариултай морины төрөлд алтан медаль хүртсэн байна.

       Мөн нэгдүгээр зэргийн ангилалд О.Маргад-Эрдэнэ дамжуургын төрөлд алтан медаль, харайлтын төрлийн шигшээ тэмцээнд шалгарч өрсөлджээ.  Харин хоёрдугаар зэргийн ангилалд Б.Анирлан чөлөөт хөдөлгөөн болон дамжуургын төрөлд шигшээ тэмцээнд шалгарч өрсөлдсөн байна.