Олимп, дэлхийн хүрэл медальт, Монгол Улсын гавьяат тамирчин  Д.Отгондалай энэ өдөр мэндэлжээ. Тэрбээр Рио 2016 олимпын наадамд 60 кг-ын жинд хүрэл медаль хүртсэн бөгөөд мөнгөн медалийн төлөө Францын тамирчинтай тулалдаж, шүүгчдийн луйвраар харамсалтайгаар ялагдсан. Харин Казахстан Улсын шүүгч Рахимжан Рысбаев Монголын боксын холбооны төлөөлөгчөөс 100-250 мянган ам.доллар нэхэж, төлөөгүй тохиолдолд танай боксчин ялагдах болно гэж сүрдүүлсэн нь саяхан олон нийтэд ил болсон билээ.

           Д.Отгондалай 2017 оны дэлхийн аваргаас хүрэл медаль хүртсэний дараа мэргэжлийн бокст орохоор АНУ-ыг зорьсон. Тэндээ хэсэг хугацаанд клубт харьяалагдан бэлтгэл сургуулилалт хийж, дэлхийн эхний нэг, хоёрт эрэмбэлэгддэг “Топ ранк”-тай гэрээ хийхээр тохирчихсон байсан. Өмнө нь мэргэжлийн рингэнд таван удаа ялалт байгуулсан Филиппин Улсын боксчинтой 2020 оны гуравдугаар сард тулаан хийхээр болсон. Харамсалтай нь коронавирусний халдвараас болж гэрээ цуцлагдсан. Тэр даруйд нутагтаа ирээд эргэж буцаагүй билээ.

Одоо тэрбээр Монголын үндэсний олимпын хорооны Тамирчдын комиссын даргаар болон ХХЕГ-ын "Хилчин" спорт хороонд багш, дасгалжуулагчаар ажиллаж байгаа билээ. МУГТ Д.Отгондалайд төрсөн өдрийн мэнд хүргэж, амьдралд нь аз жаргал, эрүүл энхийг хүсэн ерөөе.