Олимпын хошой аварга уулын цаначин Микаела Шиффрин Италийн Кронплатцад болсон Дэлхийн цомын ээлжит гараанд түрүүллээ. Энэ нь түүний дэлхийн цомын 83 дахь ялалт байсан бөгөөд уг үзүүлэлтээр дээд амжилтыг эзэмшигч Линдсей Вонныг ардаа орхин бүх цаг үеийн тэргүүнд бичигдэж эхлэв.

        Тэрбээр 2022-2023 оны улиралд хэдийн есөн гараанд түрүүлээд байна. “Хэтэрхий их догдолж байсан болохоор тухайн үеийн мэдрэмжээ тайлбарлан хэлэхэд хэцүү байна. Одоо би элдэв юм бодолгүй, зүгээр л амжилтаасаа таашаал авмаар байна” хэмээн түүхэн амжилт тогтоосон Шиффрин өгүүлжээ.

          Өдгөө 27 настай америк бүсгүй 2022 оноос хойш дэлхийн цомын гараанд хурд сорихдоо 83 алт, 24 мөнгө, 24 хүрэл медаль хүртээд байгаа юм. Мөн ДАШТ-ээс зургаан алт, хоёр мөнгө, гурван хүрэл, олимпын наадмаас хоёр алт, нэг мөнгөн медаль авсан юм. Одоо Шиффринийг эрчүүдийн дээд амжилтын эзэн Ингемар Стенмаркийн 86 ялалтыг эвдэх шинэ сорилт хүлээж байна.