Монгол, Япон Улсын хооронд дипломат харилцаа тогтоосны 50 жилийн ойн хүрээнд Монголын тэшүүрийн холбоо, Японы тэшүүрийн холбоотой хамтран анх удаагаа “Тал нутгийн мөсөн шоу” арга хэмжээг нэгдүгээр сарын 27-28-нд "Степпе Арена"-д зохион байгуулна. Япон Улсаас урилгаар Рика Хонго, Цүнэхито Каракава, Чисато Үрамацү, Хирако Хонда болон Монголын мэргэжлийн уран гулгагч Гансүхийн Марал-Эрдэнэ нар оролцоно. Японоос ирэх уран гулгагчдаас хамгийн алдартай тамирчин нь Рика Хонго юм.

           Өдгөө 26 настай Хонго “ISU”-гийн томоохон тэмцээн “Four Continents” буюу дөрвөн тивийн аварга шалгаруулах тэмцээнд 2015, 2016 онд хүрэл медаль хүртэж “Rostelecom” гран при, “Finlandia” турнир тэмцээнд алтан медаль хүртэж байсан. Тэрбээр 2015 онд хамгийн оргил амжилтаа үзүүлж, өрсөлдөөн ихтэй Японы Улсын аваргаасаа мөнгө, “Four Continents”-т хүрэл медаль хүртэж, “Rostelecom Cup” гран при болон Азийн нээлттэй тэмцээнд түрүүлж байжээ.