Японы мэргэжлийн сүмогийн Хацү башё болж, өндөрлөлөө. Энэхүү тэмцээнд Комүсүби Кирибаяама Б.Лхагвасүрэн 11 даваа дөрвөн унаатай, башёг амжилттай дуусгаснаар Гиношо буюу уран барилдааны шагналыг анх удаа хүртжээ. Тэрбээр Японы мэргэжлийн сүмо бөхийн “Мичинокү” дэвжээний бөх юм. Бямбачулууны Лхагвасүрэн нь анх үндэсний бөх, жүдо бөхөөр хичээллэж байсан бол өсвөр үеийн улсын аварга шалгаруулах үндэсний бөхийн барилдаанд жил дараалан шагналт зургадугаар байрт шалгарч, уран барилдаанаар мэргэжлийн сүмод элссэн түүхтэй.

         Тэрбээр энэ тухай “Аварга” Биеийн тамирын дээд сургуульд элсээд хоёр, гурван жил сурсан юм. Есдүгээр сарын нэгэнд сургууль дээрээ очтол Адьяахүү багш “Японоос нэг багш ирж хүүхэд сумод шалгаруулна гэнэ. Чи нэг ороод үзээч. Аль аль талдаа барилдчих ч юм шиг. Тэнцвэл Япон явна” гэлээ. Нэг их ч дуртай байгаагүй юм аа. Багш хэлж байгаа болохоор л зөрсөнгүй.  2014 онд яг энэ дэвжээндээ гурван хүүхэд, багштайгаа хамт ирж, барилдаад, хоол идээд л шалгаж авах Мичинокү ояагата бидний бэлтгэлийг ажиглаад л байлаа. Бэлтгэлээ хийж, хоолоо идчихээд ойрхон байрлаж байсан буудалдаа очоод л хамтдаа сууж байгаад ярьдаг байв. Ингэхдээ "Больё. Ийм хэцүү бэлтгэлтэй юм байна. Энэ сумог барахгүй юм байна" гэж бодсон. Нэг удаа өглөөний бэлтгэл хийгээд л халширсан. Найзууд бас барилдаж байгаа монгол сумоч нараас “Дээшээ гараад цолтой л болчихвол сумо гоё шүү дээ” гэдэг үг санаанд орсон. Гэнэт хүчээ үзээд алдъя гэсэн бодол орж ирээд чармайж эхэлсэн. Тэр үед хамт байсан орчуулагч япончууд хүний хичээл зүтгэлийг их хардаг юм гэж сонссоноос хойш ямар нэгэн аргаар багшийн нүдэнд нь өртчих гээд л сургуулилтандаа чармайгаад л. Багшийн нүдэн дээр идэж өгнө. Ингэсээр байгаад буцлаа. Долоо хоногийн дараа хариу ирнэ гэв. Байдаггүй. Бараг сар болох гэж байлаа. Би ч тэнцсэнгүй дээ л гэж бодлоо. Хамт явсан хүүхдүүдээс хамгийн жижиг нь. Гэнэт Адьяахүү багшаас “Тэнцчихлээ. Чи одоо яах вэ? Шууд хариугаа хэл” гэж шавдуулав. Нэлээн тулгамдав. За ээж аав руугаа яриад үзье л гэлээ. Тэд өөрийнхөө амьдралыг өөрөө шийд гэв. Ингээд Япон явсан юм” гэж ярьсан байдаг. Ийнхүү тэрбээр сүмогийн дэвжээ рүү эргэлт буцалтгүй орж, өдгөө барилдсаар байна.Ингэхдээ Мэргэжлийн сүмо бөхийн дээд зиндааны Маэгшира 17 чансаанд эрэмблэгдэн барилдаж байгаа сүмоч. Сандамэ болон Макушта зиндаанд тус бүр түрүүлж байсан.

      Түүний талаарх зарим баримтыг хүргэж байна.

-Дорнод аймгийн Сэргэлэн суманд төрж, өссөн.

-Гурван хүүхэдтэй айлын дундах нь.

-Аав, ээжийн талаасаа бөхийн удамтай.

-Арван жилийн сургуулиа төгсөөд “Ажнай” клубт  Эрдэнэбилэг багшийн шавь болон  жүдогоор хичээллэж эхэлсэн.

-Хүүхдийн бөөрөнцөг шидэлтийн  улсын рекорд эвдэж байсан.