Жүдо бөхийн -100 кг-ын жингийн дэлхийн аваргын хүрэл медальт, Монгол Улсын гавьяат тамирчин, цэргийн арслан Лхагвасүрэнгийн Отгонбаатарын төрсөн өдөр өнөөдөр тохиож байна. Тэрбээр Архангай аймгийн Батцэнгэл суманд 1993 оны нэгдүгээр сарын 30-ны өдөр мэндэлжээ.  Гавьяат тамирчин Л.Отгонбаатар Астана 2015 ДАШТ-ий багийн хүрэл, Баку 2018 ДАШТ-ий -100 кг-ын жинд хүрэл, Инчон 2014, Жакарта 2018 Азийн наадмын хүрэл медальтай. Рио 2016 олимпын наадмын шагналт тавдугаар байрын амжилттай. Бакугийн ДАШТ-д Японы дэлхийн аварга Аарон Вольфийг ялж хүрэл медаль хүртэн бөмбөрцөгийн тамирчин болж байлаа. Харин Рио 2016 олимпын наадамд мөрний шөрмөсөө сэмлэн тасалсан харамсалтай  бэртэл авч медаль хүртэж чадаагүй билээ. Дэлхийн жүдогийн мэргэжилтнүүдийн нэрлэдэг "Аюултай монголчууд"-ын нэг бөмбөрцөгийн бөх Лхагвасүрэнгийн Отгонбаатарт төрсөн өдрийн мэнд хүргэж, аз жаргал хүсье.