“UNC-2023” 15 спорт холбооны нэгдсэн УАШТ-ий тав дахь өдөр Монголын уулчдын үндэсний холбоо, мөсөнд авиралтын найм дахь удаагийн УАШТ-ийг “Степпе Арена”-гийн гадна мөсөн хананд амжилттай зохион байгуулжээ. Тэмцээн залуучуудын болон насанд хүрэгчдийн ангилалд аваргаа тодруулсан байна.

                Монголын мөсөнд авиралтын шигшээ багийн тамирчид энэ өдрүүдэд Франц Улсад дэлхийн цомын тэмцээнд өрсөлдөж байгаа юм. Тийм учир шинэ залуу тамирчид Энэ удаагийн УАШТ-д түлхүү оролцсон байна. Өмнө нь хөдөө орон нутагт тогтмол зохион байгуулагддаг байсан тус тэмцээн анх удаагаа Улаанбаатар хотноо зохион байгуулагдснаараа онцлог болжээ.

           Эрэгтэйчүүдийн залуучуудын “В” ангиллын 15-17 насанд Сүхбаатарын Итгэл тэргүүн байр, хоёрдугаар байрт Мөнхзаяагийн Төгөлдөр, гуравдугаар байрт Батзоригийн Мөнхбаатар шаогарсан байна. Эрэгтэйчүүдийн залуучуудын “А” ангиллын 18-20 насанд тэргүүн байрыг Бөхбаатарын Батчулуун эзэлжээ.

             Харин эрэгтэйчүүдийн насанд хүрэгчдийн +21 насанд Цэвээнсүрэнгийн Нялхбаяр, Жамбалдоржийн Сэдэд, Оюунбатын Энхбат нар эхний гурван байрт шалгарсан байна. Эмэгтэйчүүдийн залуучуудын “В” ангиллын 15-17 насанд Батбаатарын Азбаяр, Жанботагийн Амина, Сонинсайханы Энхжин нар эхний гурван байрыг эзэлжээ.

       Эмэгтэйчүүдийн залуучуудын “А” ангиллын 18-20 насанд Нямдоогийн Сэлэнгэ, Цэцэгмаагийн Анар, Сонинсайханы Бадамханд, эмэгтэйчүүдийн насанд хүрэгчдийн +21 насанд Батжаргалын Баярмаа, Очигбалын Ууганцэцэг, Отгонбилэгийн Дулмаа нар алтан, мөнгө, хүрэл медалийн эзэд болсон байна.