Хорин хоёр жилийн золтой өдрүүдийн

Хором бүрт надтай хамт байж

Дээлийн минь захыг мушгиж уухайлсан

Дэндүү өгөөмөр ард түмэн та бүхэндээ баярлалаа.

Өнөөдөр албан ёсоор дэвжээндээ хүндэтгэл үзүүлж санаа амарлаа.

Баярлалаа жүдо, баярлалаа

Хамтын хүч амжилт

Амжилтын төлөө хамтдаа...  хэмээн тэрбээр хэллээ.

Жүдогийн цуут аварга, дөрвөн өөр жинд олон улсын тэмцээнээс медаль хүртэж, бөмбөрцөгийн татамид монгол жүдочны эд хавыг гайхуулан бишрүүлж явсан агуу жүдочин Х.Цагаанбаатар албан ёсоор зодог тайллаа. Тэрбээр өнөөдөр 2022 оны нэгдүгээр сарын 14-ний өдөр жүдо бөхийн Монгол Улсын аварга шалгаруулах тэмцээний үеэр зодог тайлж байна. Х.Цагаанбаатар 90 кг-ын жингийн хүрэл медалийн төлөө барилдах байсан ч нутгийн дүү Б.Мөнхбаярт тахимаа өгч, дэлхийд данстай тамирчин хүний буйр заан хүрэл медалиа бэлэглэв.

Тэрбээр жүдо бөхийн Монгол Улсын аварга шалгаруулах тэмцээнд 11 удаа түрүүлсэн гайхамшигтай аварга билээ. 1995 оноос эхэлсэн тамирчны 28 жилийн тамирчны замналаа ийнхүү  38 насан дээрээ өндөрлүүлж байна. Хашбаатарын Цагаанбаатар 1984 оны гуравдугаар сарын 19-нд Увс аймгийн Баруунтуруун суманд төрсөн. 1995 оноос анх жүдо барилдаанаар хичээллэж эхэлсэн. 2004 оны Афины олимпоос 20 настайдаа 60 кг-ын жинд хүрэл медаль хүртэж байв. Жүдо бөхийн Нидерландын 2009 оны ДАШТ-ээс алтан медаль, Токио 2010 оны ДАШТ-ээс хүрэл медаль хүртэж байсан. Эх орондоо жүдо бөхийн анхны дэлхийн аваргын алтан медалийг авчирсан нь гайхалтай сайхан мөч байлаа.

Түүний дэлхийн аваргын алтан медаль “булган сүүлтэй” байж араасаа М.Уранцэцэг, Г.Болдбаатар, Д.Сумьяа, Ц.Цогтбаатар нарын дэлхийн аваргуудыг дагуулсан.  Х.Цагаанбаатар Монгол Улсын гавьяат тамирчин, Хөдөлмөрийн баатар цолтой нэгэн. Азийн наадмын аварга, Азийн хошой аварга, самбо бөхийн дэлхийн хошой аварга. МҮОХ-ны оны шилдэг тамирчны "Бөртэ чоно" цомыг гурван удаа (2004, 2006, 2009) ондуудад тус бүр хүртсэн.

Дэлхийн домогт бөх Х.Цагаанбаатар зодог тайлах шийдвэрээ Ташкент 2022 дэлхийн аварга шалгаруулах тэмцээний дараа гаргасан байна. Х.Цагаанбаатар, “Ирэх онд болох олимпод монголын баг тамирчид, ард түмэн ялалт хүсэж байгаа учраас тамирчиддаа зааж зөвлөж, багш нартаа туслаж төрийн дууллаа олон эгшиглүүлэхийн төлөө өөрийгөө зориулах болсондоо баяртай байна.” хэмээлээ

Жүдо бөхийн бүхий л төрлийн тэмцээнээс медаль хүртсэн түүнийг зодог тайлсанд харуусах хүн олон байгаа ч өөрийн хойч үеэ бэлтгэхээр  дасгалжуулагчийн албанд томилогдсонд нь талархаж буй нь түүнээс олон байгаа болов уу. Тэрбээр өөрийнхөө авч чадаагүй олимпын аварга цолтон төрүүлэхийн төлөө хөлс хүч, чаддаг мэддэг бүхнээ зориулахаар шийдэж жүдо бөхийн “Цагаанбаатар академи”-ийг байгуулан ажиллаж байна.  Х.Цагаанбаатар “Зодог тайллаа ч татамигаасаа холдохгүй учраас хүнд шийдвэр биш байлаа" гэдэг хариултыг хэллээ.

Жүдогийн цуут дэлхийн аварга Х.Цагаанбаатар 60, 66, 73, 81 кг гэсэн дөрвөн өөр жинд олон улсын тэмцээнээс медаль авч байсан нь домог яриа болон үлдлээ. Цагаанаа маань 28 жилийн тамирчны замналаа ийнхүү өндөрлүүлж байна даа. Аваргадаа баяр хүргэе, баярлалаа Цагаанаа. Олон, олон олимп, дэлхийн аваргуудыг  төрүүлэн гаргаарай.