Тэнгэр бүүдийсэн саарал өдөр би чамд дурласан

Надаа ичингүйрэх тэр зан авирт чинь би татагдсан

Чиний зан авир надад дэндүү гоёдоно

Үзэсгэлэн гоог чинь бишрэх залуус зөндөө олширно... гэж уянгалуулан дуулах залуу уран бүтээлч Saffron bane буюу Э.Бат-Эрдэнэтэй ярилцлаа.

-Сайн байна уу? Сүүлийн үеийн уран бүтээлийн сонин сайхнаас яриагаа эхлэх үү?

               -Сайн байна уу. Би Унгарт Улсад боловсролын шинжлэх ухааны мэргэжлээр магистрын зэрэг хамгаалахаар суралцаж байна. Энэ үедээ ч уран бүтээлээ хоцрогдуулахгүйг хичээж байгаа. Тухайн үеийн сэтгэл хөдлөлөөрөө л уран бүтээлээ хийдэг дээ. 

-Уран бүтээлийнхээ гарааг хэзээнээс эхэлж байв. Урлагтай ойр хүүхэд байв уу, бага насныхаа талаар яриа дэлгээч?

               -Хүүхэд байхдаа тийм ч хөдөлгөөнтэй, нээлттэй байгаагүй. Дуу хийх талаар төсөөлж үзээгүй дээ. Харин их сургуульд ороод бага зэрэг нээгдэж эхэлсэн.  Найзыгаа дуу хийхийг хараад сонирхож эхэлсэн дээ. Цар тахлын үед хөл хорионд байх үедээ сонирхлоороо дуу хийж эхэлсэн. Анхны дуунуудаа интернэтээс устгасан. Би тогтсон урсгал болон өнгө аяст баригдаж уран бүтээлээ хийдэггүй.

-Гэр бүлд нь урлагийн хүмүүс байдаг уу?

               -Аав минь урлагийн авьяастай, ямар ч  хөгжмийн зэмсгийг сонсголоороо тоглодог.  Тэрнээс өөр урлагийн чиглэлээр ажилладаг хүн байдаггүй. Би ч өөрийгөө урлагийн хүн гэж хэлэх дургүй. Урлаг бол миний хобби. Зарим дуунууд дээр минь муухай үг гардаг болохоор гэр бүлээсээ нуух гэж их хичээсэн. Бүтэн жил л нууж чадсан даа. Дургүй байх болов уу гэсэн дэмжиж, эергээр хүлээж авсан даа.

-Нэрийхээ утгыг манай уншигчдад тайлбарлаж өгөөч?

               -Анх Баагий гэх нэрээр дуугаа цацдаг байсан. Тэгээд нэр маань нэг л сонин сонсогдоод байхаар нь SAFFRON BANE гэж өөрчилсөн. SAFFRON гэдэг нь цэцэгээс гаргаж маш хэцүү гаргаж авдаг халуу ногоог хэлдэг.  Би олон урсгал хольж дуу хийдэг болохоор энэ нэр их тохиромжтой юм шиг санагдсан.

-Таны “Бүүдгэр” гэх дуу надад их таалагддаг юм. Уг дууны тухай яриа дэлгээч?

               -Хайр бол мөнхийн хэзээ ч хуучрахгүй сэдэв шүү дээ. Тэгээд хайрын тухай дуу хиймээр санагдаад нэг өдрийн дотор л бүтээж байсан. Сонсогчдын сонирхолд нийцэж, өндөр хандалт авна гэж бодоогүй. Хүмүүс намайг өөрийнхөө амьдралын тухай магадгүй хагацал үзсэн болохоор тийм дуу бичсэн гэж боддог юм шиг байна лээ. Гэхдээ надад амьдралаасаа сэдэвлэсэн ганц ч дуу байхгүй.

-Таны ихэнх дуу хайрын тухай байдаг шүү дээ. Тэгвэл Э.Бат-Эрдэнэ гэх хүний хайрыг харах өнцөг юу вэ?

               -Бие нь хол байсан ч оюун бодол нь үргэлж тэр хүний дэргэд хүлээтэй байж, түүнийхээ төлөө юу ч хамаагүй хийж, бүхнээ зориулж чадах хэмжээний сэтгэл татагдахыг л хайр гэдэг байх.  

-Тайзан дээр гарахад, дуулахад тусгай мэдрэмж төрдөг гэлээ. Танд яг ямар мэдрэмж төрдөг вэ?

               -Би хүмүүсийн анхааралд байх дургүй болохоор тайзан дээр гарах бага зэрэг дургүй. Гэхдээ гарах үедээ асуудалгүй дуулдаг.

-Уран бүтээлч болгон өөрийн гэсэн тухтай  орчинд үгээ бичих, бүтээлээ гаргах дуртай байдаг байх. Таны хувьд?

               -Би жижигхэн өрөөнд компьютерынхоо урд ганцаараа суух үедээ тухтай байдаг.

-Туршиж үзэхийг хүсдэг зүйл бий юү?

               -Одоогоор чанартай Англи хэлний сургалт үнэгүй хийхийг хүсэж байгаа. Монголд сонирхолгүй, үнэтэй сургалтууд элбэг байдаг юм билээ.

-Ярилцсанд баярлалаа.