Их Британийн уран бүтээлч Эд Шираны “The Guardian” сонинд өгсөн нэгэн ярилцлагыг хөрвүүлэн уншигч та бүхэнд хүргэж байна.

-Нэг л ярьсан яриа минь гурван өөр түүх болж нийгэмд түгдэг-

Эд Ширан бид хоёр Лондонгийн төв зочид буудлын хувийн ресторан орлоо. Хоолоо захиалмагцаа “Би Жастин Биберийн нүүрийг гольфын цохиураар цохисон” гэв. Намайг гайхширч, цааш тодруулан асуухад “Жастин бид хоёр Японд аялан тоглолтоор явж байсан юм. Бид согтууруулах ундаа хэрэглээгүй шүү. Ердөө л савласан цэвэр ус уугаад усанд сэлчихээд гарч ирээд байсан юм. Гэтэл Жастин Бибер дээшээ харж хэвтчихээд амандаа гольфын бөмбөг зуугаад цохь гэнэ. Үнэхээр шавдуулаад байсан болохоор нь цохисон. Гэтэл би хацрыг нь цохичихсон юм. Тэр бол миний амьдралын хамгийн новшийн мөчүүдийн нэг байлаа” гэж хэсэг алмайрч, гайхширсан асуултад минь бүрэн хариулав.

          Би түүнтэй таван жилийн өмнө Брикстоны академийн тайзны ард ярилцлага хийхэд тэр өнөөгийнхөөс илүү “ядуу” харагдаж байлаа л даа. Харин одоо бол түүний бүх л зүйл маш үнэтэй харагдана. Арга ч үгүй л дээ. Эд Ширан 20 насандаа л хамгийн анхны “Нэмэх” нэртэй цомгоо дэлхий даяар нэг сая гаруй хувь борлуулсан шилдэг уран бүтээлчдийн нэг шүү дээ. Харин өдгөө “Хуваах” нэртэй гурав дахь цомгоо нийтийн хүртээл болгож байгаа дэлхийн хамгийн шилдэг эрэгтэй поп од. Брикстоны академийн жижиг тайзан дээр “ядруухан” тоглолт хийдэг байсан түүнийг Тейлор Свифт ивээн тэтгэснээр Эд Шираны дуунууд Америкт “цахиур хагалсан” юм л даа. Ингээд л ойлгочиход болно. Түүний амьдралын тухай тоо баримт, түүхүүд ердөө л толгой эргүүлэхээс цаашгүй.  Шинэ “Хуваах” цомгийнхоо “Shape of you” дуугаа цацахад л тэр дуу 24 цагийн хугацаанд Spotify дээр 6.8 сая удаа цацагдаж, долоо хоногт 53 сая удаа цацагдсан шүү дээ. Гэхдээ Эд Ширан энэ тухайгаа ярих дургүй. Эд Шираны дууны амжилт, үзэлт нь үнэндээ түүнд нэг их хамаагүй. Аль эсвэл тэр өөрийгөө ярихгүй байх нь эелдэг байдал гэж боддог байх.

“Би аль болох л шударга байхыг хичээдэг” гэж тэр хэлээд “Сэтгүүлчдийн ажлыг хүндэтгэхийн тулд ярилцлага өгөхөөс нэг их төвөгшөөдөггүй. Гэсэн ч ярилцлага өгөх бүрд надад улам хэцүү санагдах боллоо. Миний өгсөн яриа маргааш нь гэхэд гурван өөр түүх болж нийгэмд түгдэг” гэв.

-Хэдэн зуун дуу бүтээсэн ч хаяж, өөр уран бүтээлчид өгсөн-

Эд Шираны хөгжим, уран бүтээл, замнал, ирээдүйн тухай асар их хүсэл, эрмэлзэл өмнө нь түүнтэй ярилцахад байгаагүй. Аль эсвэл би олж хараагүй байх. Тэр өөрийнх нь бүтээлд дургүй гэсэн хүмүүстэй ч эелдэг харьцдаг нэгэн. Магадгүй нэг сайхан сэтгэл, эелдэг зан түүний амьдралын түүхээс улбаатай байх л даа. Тэрбээр анх хөгжмийн замналаа эхэлж байсан талаараа “Би анх цомгоо гаргах үедээ маш их сандарч, айж байлаа. Би чинь өмнө нь ямар ч амжилтад хүрч байгаагүй, цомог ч зарж байгаагүй, тасалбар ч тарааж байгаагүй шүү дээ. Миний хийсэн, хичээсэн бүхэн хормын дотор дуусах вий гэж айж байсан” гэнэ. Харин “Одоо бол шүүмжлэгчид миний насан туршдаа гаргах бүх цомог дээр хамгийн муу үнэлгээ өгсөн ч юунаас ч айлгүйгээр, юунд ч санаа зовохгүйгээр хөгжмөө тоглох боломжтой боллоо” хэмээсэн юм.

          Адель, Бейонсе, Тейлор, Дрейк, Уикнд, Бруно гээд л Эд Шираны өрсөлдөгч гэж хэлж болохуйц уран бүтээлчид хэдий нь цомгоо гаргаад өндөр амжилтад хүрсэн. Тэгэхээр түүний шинэ “Хуваах” цомог тодорхой хэмжээний хязгаар, амжилтыг давах шаардлагатай болж байгаа юм. Энэ тухай тэрбээр “Энд бусад уран бүтээлч өрсөлдөх нэг их хамаагүй гэж бодож байна. Гэхдээ “Хуваах” цомгийг маш сайн зарагдахыг мэдэж байгаа. Маш их зарагдана. Дахиж ийм зүйл тохиохгүй. Миний дараа дараагийн цомог түүнийг нь гүйцэхгүй л болов уу гэж айж байна” гэлээ. 20 жилийн дараа “Хуваах” цомгийг хараад “Хамгийн шилдэг цомог” гэж бишрэн харж байгаа хүүг хараад Эд Ширан ч өөрөөрөө бахархах гэнэ. Эд Ширан хэдэн зуун дуу бүтээж, шүлэг бичсэн ихэнхийг нь хаяж, эсвэл бусад уран бүтээлчид өгчихсөн. Түүний бүтээлүүдээс Рианна дууг болгосон нь бий. Бас 2016 оны хамгийн их борлуулалттай сингл болсон Жастин Биберийн “Love yourself” дууг ч үнэндээ тэр ч бүтээсэн.

Эд Ширан Англид төрж, Америкт “од” болсон ч Ирланд гаралтай нэгэн. Тэр ардын хөгжимд дуртай. Үнэндээ англи хүмүүс дотоодын уран бүтээлчдэд нэг их дургүй байдаг шиг санагддаг. Харин Эд Ширанд дургүйлхээгүй. Харин ч түүнийг халуун, дотноор тэврэн авсан. Ирланд ардын хөгжим болон хип хоп хэмнэлтэй түүний дууг сонсоод таалагдаагүй хүн байвал миний ярилцлагыг уншихгүй ч байж болно шүү дээ.

Эд Ширан бүтэн нэг өдрийн амьдралынхаа 90 хувьд нь аз жаргалтай байдаг гэнэ. Түүний хэлснээр бол “Нэг өдрийн 90 хувьд нь аз жаргалтай, хөгжилтэй байж чаддаг. Харин үлдсэн 10 хувьд нь боддог. Би өөрийгөө эвдэж, сүйтгэсэн үедээ л илүү уран бүтээлч байж чадах юм шиг санагддаг” хэмээсэн юм. Тэр тоглолтын дараа л тайвширсан мэт сайн унтаж чаддаг гэнэ.

          Тэр уран бүтээлээсээ их хэмжээний орлого олсон. Маш том эдлэн худалдаж авсан. Унадаггүй ч гэсэн маш олон спорт автомашин гэрийнхээ гадаа эгнүүлж, гэртээ ресторан бариулсан. Эд Ширан энэ тухай “Мөнгө гэдэг үнэхээр хачин зүйл. Эргэн тойрон дахь бүх хүний надтай харьцах хандлагыг нь өөрчилдөг. Уг нь энэ бүхэн маш жижиг зүйл дээр тогтдог. Харин миний хувьд ойр дотнын хэдхэн найзтайгаа өөрийн гэсэн ресторандаа цэнгэхийг илүүд үзсэн” гэлээ. Түүнд өмнө нь нэг зүйл тохиолдож байж л дээ. Нэг удаа түүнийг хотын нэртэй ресторанаас залгаж, дуудсан гэнэ. Очиход нь “Өчигдөр танай найзууд ирж, цэнгээд явсан. Таныг тооцоог нь төлнө” гэж хэлээд 6000 ам.долларын тооцооны хуудас өгчээ. Эд Ширан энэ тухайгаа ярьснаа гүн санаа алдаж, урагш тонгойгоод шанаагаа тулав. Эд Ширан бол Их Британийн Уэмбли цэнгэлдэх хүрээлэнд ганцаараа бүтэн тоглолт хийсэн  түүхэн дэх цорын ганц уран бүтээлч. Тэгмэгцээ “Надад зав, чөлөө гарах л юм бол цор ганцаараа салхинд сууж, өглөөний цайг ганцаараа уух дуртай” гэлээ. Ийм л учраас тэр Исланд, Гана, Япон, Либери гээд л дэлхийг тойрч, ганцаараа аялал хийсэн. Тэгэхдээ нэрээ нууцлах, гэрэл зураг авахуулахгүй байхыг хичээсэн гэнэ. Эд “Би мөнхөд энэ чигээрээ байхгүйгээ мэддэг. Бусадтай харилцаж, энгийн харилцаа өрнүүлэх, хүүхэд болох ч тухай бодож байгаа” хэмээсэн юм.

          Ингэж хэлснийхээ дараа нэг их удалгүй инээд алдаж, “Гэхдээ би яг сайн хэлж мэдэхгүй байна аа. Магадгүй энэ бодол минь цаг хугацаанд элэгдэж, устаж, үгүй болж ч магадгүй шүү дээ” гэлээ. 16 насандаа сургуулиасаа хөөгдөж, гитарнаас өөр зүйлгүй тэр ирээдүйгээ ингэж томоор бүтээж чадсан. Бидний ярилцлагын төгсгөлд Эд Ширан “Хүмүүс намайг юу гэж бодох нь хамаагүй. Гэхдээ тэд над шиг нөхцөл байдалд байсан бол надтай ижил зүйл хийх байсныг л мэдэж байна” гэв.

2017 оны гуравдугаар сарын 2.