“Андра” академийн гүйцэтгэх захирал, мисс, топ модель Х.Бадамгэрэлийг урьж, ярилцлаа. Өнөө цагийн сайхан бүсгүйчүүдийн нэг тэрбээр 2007 онд “Үнсгэлжин” тэмцээнд түрүүлэн загварын ертөнцөд хөл тавьж байсан. Түүнээс хойш олон улсын загварын шоу, фестивалиуд, миссийн тэмцээнүүдэд эх орныхоо нэрийг удаа дараа өндөрт өргөн, амжилттай оролцож ирсэн билээ.     

         Өдгөө тэрбээр “Андра” академийг үүсгэн байгуулж, шилдэг залуу загвар өмсөгчдийг бэлтгэж байна. Ирэх жил тус академи 10 жилийн ойгоо тэмдэглэх бөгөөд ирээдүйд загвар хувь хүний хөгжил хосолсон томоохон сургуультай болох зорилго тавин ажиллаж байгаа аж. 

-Сайн байна уу. Таны үүсгэн байгуулсан “Андра” академи Монголын  загварын салбарт томоохон байр суурь эзэлж, бэлтгэсэн шавь нар тань тив, дэлхийн тэмцээнүүдэд амжилттай оролцож байна шүү дээ. Академийнхаа ирээдүйн төлөвлөгөөний тухай яриач?

            -Манай “Андра” академи элсэгчдэдээ загвар, гоо зүйн талаар хичээл заахаас гадна хувь хүний хөгжил дээр нь маш сайн ажилладаг. Бид шавь нарыгаа эмх цэгцтэй, найдвартай, хариуцлагатай иргэн болгохыг зорьдог. Хүн хэчнээн гоо үзэсгэлэнтэй, ухаантай байсан ч хариуцлагагүй бол хэн ч биш. Тиймээс шавь нартаа “Гурван сая хүний дунд амжилттай амьдрах бол амархан. Харин долоон тэрбум хүний дунд хэн нэгэн болохын тулд хариуцлага хэрэгтэй” гэж хэлдэг. Хэн ч хөдөлмөрлөж, өөрийгөө хөгжүүлж чадвал үзэсгэлэнтэй, гоё сайхан болж чадна. Хамгийн чухал нь өөрийнхөө мөн чанарыг таньсан, үнэ цэнтэй монгол хүн болж төлөвших нь л амьдралд хэрэгтэй юм даа. 

-Загварын салбараас өөр ямар ажил эрхэлж байна вэ?

       -Одоогийн байдлаар үндсэн дөрвөн ажил хийж байна. Эхнийх нь мэдээж “Андра” академидаа багшилж, загварын салбарын шинэ үеэ бэлтгэж байгаа. Миний үндсэн мэргэжил маркетингийн менежер учир байгууллагуудад маркетингийн зөвлөгөө өгдөг. Мөн олон улсын  хувь хүний мэргэжлийн сургагч багшаар 13 дахь жилдээ ажиллаж байна. Үүнээс гадна “Business network international” гэх олон улсын бизнесийн байгууллагын Монгол дахь анхны албан ёсны салбарынх нь дэд ерөнхийлөгчөөр ажиллаад, чадварлаг залуучуудтай нэгдээд явж байгаа. Үүний дээр  нийгэм рүүгээ чиглэсэн сайн дурын ажлуудыг байнга хийж байна даа.

-Цаг төлөвлөлтөө хэрхэн гаргадаг вэ?               

       -Би бүх ажлаа цаг, минутаар нь төлөвлөдөг. Түгжрэлийн цагийг хүртэл тооцож төлөвлөдөг. Хүн ер нь төлөвлөж чаддаг, төлөвлөсөн ажлаа яг цагтаа амжуулж чаддаг байхад амжилттай амьдарч чадна гэж боддог. Би “Хүүхэд байхдаа алдаж болно. Оюутан болоод хагас алд, ажлын талбарт гараад харин алдах эрхгүй” гэсэн зарчим баримталдаг.

-Өнөөдрийн Х.Бадамгэрэлийг ээж тань бүтээсэн байх. Ээжийнхээ талаар яриач?

            -Манай ээж амбицтай, өөртөө арчаатай, хүчирхэг эмэгтэй байдаг. Ээж маань намайг өсгөхдөө хэзээ ч “Чи сайн эзэгтэй байх ёстой шүү” гэж өсгөөгүй. Харин “Чи маш хүчтэй сэтгэл зүйтэй, хэнээс ч хараат бус, бие даасан, бусдад эерэгээр нөлөөлдөг эмэгтэй байгаарай” гэж заасан. Мөн “Чи юм хийхгүй байж болно. Гэхдээ хийе гэвэл чаддаг эмэгтэй  бай”  гэж сургасан. Намайг хэзээ ч гэрийн ажлаар хязгаарлаагүй, илүү өргөн цар хүрээтэй амьдрахыг заасан даа.

-Та ямар хүүхэд байсан бэ. Бага насныхаа тухай яриач?

        -Би гурван эрэгтэй дүүтэй айлын ганц охин. Гэхдээ хэзээ ч гэрийнхээ бүх ажлыг ганцаараа хийж байгаагүй. Бага байхын бүх зүйлийг төлөвлөдөг, зохион байгуулдаг байсан. Хичээл тарах, ээж, аавын гэртээ ирэх цагийг тооцоод, гэрийнхээ ажлыг дүү нартайгаа хуваагаад хийчихдэг байлаа. Тэр маань надад зохион байгуулагч чадварыг суулгаж өгсөн гэж боддог.

-Гурван эрэгтэй дүүтэй, айлын ганц охин байх ямар байдаг вэ. Эршүүд зантай байсан уу?

        -Мэдээж эршүүд зан чанартай өссөн байх. Гэхдээ эршүүд байна гэдэг нь эрэгтэй хувцас өмсөөд л, сүр сар гэж үсэрч харайгаад л байдаг байсан гэсэн үг биш л дээ. Харин илүү зарчимч, хурдан шийдвэр гаргадаг, илүү алсын хараатай гэх өнцгөөс нь харж болно оо. 

-Таны дэргэд үргэлж хамт байж дэмждэг хүн нь мэдээж таны нөхөр байх. Ханийнхаа тухай ярьж болох уу?

      -Би маш их хүсэл тэмүүлэл дүүрэн, үргэлж шинэ зүйл туршиж, хийж бүтээх дуртай эмэгтэй. Тэр зан чанарыг нөхөр маань үргэлж ойлгож, дэмжиж байдагт нь талархаж явдаг. Бид найз нөхөд, хамтрагчид шиг нэгнийхээ ажил, алсын харааг тодорхой ярилцаж, хамтдаа урагшилдаг. Манай нөхрийн хувьд эмэгтэй хүн өөртөй нь яг ижил түвшинд байж, нийгэмд манлайлж чадна гэж боддог хүн л дээ. Тэр зан чанар нь надад таалагддаг. Нэг ёсондоо үхэн үхтэл миний дэргэд байх үнэнч найз, хамтрагч, дэмжигч минь юм.

-Энэ хүртэл явахад шантрах тохиол гарч байв уу?

        -Мэдээж маш их байсан. Гэхдээ тэр бодол маань удаан хугацаанд өрнөдөгггүй. Би ер нь гуниглаж суудаг төрлийн хүн биш л дээ.  Хэцүү зүйл тохиолдвол энэ асуудлаас хэрхэн гарах вэ, яаж өөрийгөө хөгжүүлэх вэ гэдэг тал дээр ажилладаг.  Гуниглаад  л суугаад байвал хүн амжилт гаргах цагаасаа л хороож байна  гэсэн үг шүү дээ.