Эмоци продакшн 10 жилийнхээ ойг угтаж, "Баян боол" уран сайхны киног үзэгчдэд хүргэсэн. Тэгвэл бид тус киноноос дараах таван зүйлийг онцолж байна.

-ГЭГЭЭН ХАЙР ДУРЛАЛ-

     Хайрын өмнө бүх зүйл хүчин мөхөстдөг. Хайр бол баян, хоосон, муухай, сайхан юуг ч үл харгалзан оршдог зүйл гэдгийг "Баян боол" кино бидэнд үзүүлж байна. Дамиран хэдийгээр баян айлын эрх танхи хүү ч гэлээ сайхан сэтгэлтэй, бусдыг хайрлаж ойлгох, зүрх сэтгэлтэй хүн гэдгийг киноны үйл явдлаар илрүүлдэг. Ингэж илэрхийлэхдээ гэгээн хайр дурлалыг гол нуруугаа болгосон нь үзэгчдийн сэтгэлийг хамгийн их татсан. Жинхнээсээ хайрлаж, дурласан хүнээс өөрөөс нь хайр, үйлдэл ундарч байдгийг тод харуулсан. 

-КИНОНЫ ҮЙЛ ЯВДЛЫН ШИЙДЭЛ-

   Киноны үйл явдлыг давхар киноны зураг авч байгаагаар өрнүүлсэн нь хамгийн сонирхолтой шийдэл байлаа. Учир нь, үзэгчид бэлэн болсон уран бүтээлийг л үздэг болохоос кино, уран бүтээлийн ар тал хэрхэн өрнөж, зургийн талбайд уран бүтээлчдийн амьдрал хэрхэн өрнөдгийг тэр бүр мэдэхгүй. Тэгвэл үзэгчдэд кино гэдэг нүсэр их ажил, хөдөлмөр, бэлтгэл сургуулилт гэдгийг мэдрүүлснээрээ онцлог уран бүтээл болсон. Тэр дундаа найруулагч, жүжигчид хэрхэн эрсдэл, зориг гаргаж ажилладгийг мөн давхар харуулснаараа сонирхолтой содон байлаа.

-ЧИМЭГ ДҮРҮҮД-

     Кино бүрд л гол дүр, үйл явдлаа амт оруулсан чимэг дүр байдаг. Гэхдээ "Баян боол" киноны чимэг дүрүүд яг оносон байна лээ. Тухайлбал,  залуу жүжигчин Х.Баярмаагийн тоглосон Сүнжид ахайтаны дүр цаанаа нэг үзэгчдийг татсан хоржоонтой мөртлөө хувь уран бүтээлчээс чамгүй ур чадвар шаардсан дүр байна лээ. Харин залуу жүжигчин Г.Эзэнмөнхийн тоглосон тайжийн хүүгийн дүр өөрт нь тун зохицсон байв. За тэгээд Жери буюу Т.Бадамжав, МУСТА, жүжигчин Д.Түвшинтөр нарын дүр ч мөн нэг тийм сонирхолтой, хөгжилтэйгээр киногоо чимж байсан. Харин Г.Нарансолонго, Б.Батмэнд, МУГЖ, Ш.Доржсүрэнгийн дүрүүд арай жаахан тулхтайгаар сүлж байгаа нь уран бүтээлийг бүр ч амттай, чамбай болгожээ.

-КИНО БАГ БҮРЭЛДЭХҮҮН-

     Эмоци продакшн бүрэн бүрэлдэхүүнээрээ оролцож, мөн өөр залуу уран бүтээлчид нэмж оролцсон мөртлөө цөм өөр, өөрийн гэсэн дүртэй байсан нь сонирхол татсан. Тухайн хүрээнд рольгүй нэг ч хүн байхгүй бөгөөд морь хөтөлж яваа нэгэн ч дүр байгаа нь үзэхэд уйдамгүй байсан. Нэг тийм эрт цагийн хүрээнд очсон мэт л сэтгэгдлийг төрүүлж байсан. Боол хүртэл дүр гэдгийг эл кино үзэгчдэд үйл явдал, дүрийнхээ тоглолтоор үзүүлж, олон хүний гар, сэтгэл нийлсэн бүтээл гэдэг нь харагдаж байв.

-ЭРТ БА ОДОО ЦАГ-

      Киног үзээд үнэхээр л Дамирантай хамт цаг хугацаагаар аялж байгаа мэт сэтгэгдэл төрсөн. Орчин цагт цэнгүүний газар байж байснаа гэнэт эрт цагийн хүрээ рүү шилжсэн нь мөн л кино бүрд давтагдаад байдаггүй сонин шийдэл. Хэрэв кинонд гарч байсан бол зүүд юм уу бодлоор л гарахаар. Харин "Баян боол" кинонд хоёр цаг үеийг бодитоор үзүүлж байгаа нь үзэгчдийг давхар цаг хугацаагаар аялуулж байх шиг санагдсан. Гэхдээ бид аль ч цагт байсан нэгнээ хайрлах зүрх сэтгэлээ гээхгүйгээр оршиж чаддаг гэсэн бат бөх санааг бүтээлдээ суулгасан нь үзэгчдэд өгч байгаа хамгийн үнэт санаа байлаа.