Хошин урлаг гэх их айлын хамгийн отгон хүү  “Эмоци” продакшн энэ жил арван нас хүрлээ. Ойн баяраа угтаж, Сэлэнгэ аймгийн Хүдэр суманд зунжин зураг авалтаа хийсэн киногоо өнөө хавар нээлээ. “Баян боол” кинонд баян айлын эрх танхи хүүд ухаан суулгах гэж бүхэл бүтэн кино багийнхан хэрхэн ажиллаж, хэнийг ч хайрладаггүй, өрөвддөггүй, ойлгодоггүй, зөвхөн зугаа цэнгэл, наргиан наадамд дуртай хүүг хэрхэн ухааруулж, хал үзүүлж, хашир суулгаж, өөрөө бүхнийг ойлгоход туслаж байгаа тухай өгүүлнэ.

           Амьдралд хүн бүхнийг биеэр ойлгож, мэдрэхгүй л бол ойлгодоггүй гэсэн санааг сайтар шигтгэж, хөнгөн боловч хүний сэтгэл, люун тархинд нэгийг бодуулах уран бүтээл болжээ. Мөнхүү хайр дурлалын гэгээн салхи сэвэлзсэн, хачин их догдлол мэдрүүлсэн уран бүтээл аж. Үүгээрээ “Эмоци” баг хамт олон сайн ажиллажээ. Өөрийн гэсэн өнгө төрх, үнэр, амт, бүтэц бүрэлдэхүүнтэй тэд тэр л хана туургаа барин бүтээлээ босгож, “Энэ бол эмоцийн бүтээл шүү” гэдгийг хаанаас ч харсан ойлгохоор тамгалж чаджээ. Магад байдаг л нэг сэдэв, үйл явдал мэт боловч бид байдаг л нэг гэж олон зүйлийг үгүйсгэж, нугалж, хугалж, уран бүтээлчдийн хийж байгаа бүхнийг нураан унагаж, үнэлэхгүй болсоор үзэж, харах, өөртөө авах, шүүрдэх нэг боловч үнэ цэнтэй санааг гээгдүүлж, дээгүүр том хардаг болж.

           Байгаагаасаа үнэ цэнийг олж харахгүй, юуг өгүүлж, ямар санааг хэлэхийг зорьсныг нь мэдээгүй байж, өөр юу хүсэж, хайж, худлаа шүүмжилж суух гэж. Энэ санааг ч мөн энэ завсарт багтаамаар санагдлаа. Тийм л учраас энэ уран бүтээл жин бан нь таарсан, хэлэх санаа, хэлбэр хийц нь зохицсон тун аятайхан бүтээл болжээ гээд байгаа юм. “Эмоци” продакшн угаас айхтар л даа. Продакшны уран бүтээлчдийг жинлэвэл залуус ихэнх хувийг эзэлнэ. Жаахан ах нь Б.Баатархүү, О.Тэмүүжин, Т.Түвшинтөр, Г.Нарансолонго нар байх. Бусдаар бол тэгээд л залуу үеийн давалгаа исгэрэн түрж, уран бүтээлийн өнгө аяс залуу, шинэлэг, мөнхүү халуун оршдог. Энэ удаагийн бүтээлээс  ч мөн харагдаж байна.

-ЗАЛУУ ЖҮЖИГЧДЭЭ ТОДРУУЛСАН НЬ ИЛҮҮТЭЙ ОНОЖЭЭ-

            Урлагт үүрээ зассан продакшнуудыг анзаарахад толгойлон авч яваа уран бүтээлч юм уу эсвэл ах жүжигчид нь хамаг гол дүрээ хамаад байдаг талтай. Өнөө хэдэн залуу уран бүтээлчид нь туршлага муутай, арай болоогүй гэсэн нэрийдлээр олны хэсэг, туслах дүрд хувиарлагддаг. Тэгвэл энэ байдлыг “Эмоци” продакшн “хуу татаж”, залуу уран бүтээлчдээ илүү тодруулан, тэднийг дэмжиж, үзэгчдэд танилцуулж, дэмнэн гаргаж байгаа нь зөв оножээ. Энэ бол энэ хамт олон ихэд зөв голдирлоор яваагийн нэгэн илрэл болов уу. Үүгээрээ ихэд хүндэтгэмээр, мөнхүү зөв сайхан дүрийн хуваарилалттай бүтээл болж чаджээ.