ЮНЕСКО-гоос жил бүрийн гуравдугаар сарын 21-нийг “Дэлхийн яруу найргийн өдөр” болгон тунхагласан байдаг. Улмаар дэлхийн нийтээр яруу найргийн өдрийг 1999 оноос хойш уламжлал болгон тэмдэглэж байгаа билээ. Тэгвэл дэлхийн яруу найргийн өдрийг тохиолдуулан Монголын орчин цагийн яруу найргийн сод төлөөлөл болсон зургаан яруу найрагчийн шүлгийг хүргэе.

Яруу найрагч Б.БАТЗАЯА- Чи амьд

Өвдөлт шинэ зүйл байхаа больж

заримд нь бууж өгөөд, үс чинь

нэг нэгээрээ унаад л байвал

Чи амьд гэсэн үг.

Дурсамжуудаа шатаан дулаацаж,

яагаад нисэж үзэж болохгүй гэж?

Дурлах ч дээ, арай хүчтэй юм,

мөөг ч юмуу олж идсэн нь дээр.

Жинхэнэ мэдрэмж хүмүүсийн нүдэнд харагддаггүй.

Тиймээс, жингүйдэж явааг чинь

хэн нэг нь харчихна гэж зоволтгүй.

Араасаа хөөлгөж хар хурдаараа зугатах уу...

Амьсгаадна гэдэг дандаа сайхан зүйлийн ард ирдэг.

"Одоо яг гурав тоолоод шүү!

Нэг, хоёр, гурав..."

ойр ойрхон ингэж хэлж байвал

Чи амьд гэсэн үг.

Үхэхээсээ өмнө ахиухан шиг хийж үзэх юмс:

Үнсэлцэх, хайрлах...

Хэрэв чи явах гэж байгаа бол үлдэж буй хүмүүс

тэмүүлэл дүүрэн мөчийг чинь хаанаа ч юм

тэмдэглэн авах болно. Тиймээс,

Чи амьд гэсэн үг.

Зохиолч, яруу найрагч М.УЯНСҮХ -Уйтгар цээжнээ наргүйд итгэ, саргүйд итгэ

Уйтгарт цээжнээ наргүйд итгэ, саргүйд итгэ!

Уйтгарт цээжнээ навчгүйд итгэ, цэцэггүйд итгэ!

Уйтгарт цээжнээ харанхуйг сэтгэ, харанхуйн тэртээ

Удган эрвээхэй гэрлийн үзүүрт уйтай ниснэм!

Эрвээхэй гэвч далавчаа дэвэх нь уйтгар байдаг

Эрвэгэр нүд, дэрвэгэр сормуус, зургар хөмсөг,

Хасын гэгээ, жүнзтэй дарс, янагийн уруул,

Хайрын шүлэг, гунигт модод, намрын улирал...

Наргүйд итгэ! саргүйд итгэ! уйтгарт цээжнээ

Навчгүйд итгэ! цэцэггүйд итгэ! уйтгарт цээжнээ

Харанхуйг сэтгэ! уйтгарт цээжнээ... харанхуйн чанадаас

Харь эгшиг гэгээн зүгт биегүй алсарнам.

Зохиолч яруу найрагч Л.ӨЛЗИЙТӨГС – Амьдралд эзлэгдэхгүйн тулд

Амьдралд эзлэгдэхгүйн тулд

төөрөхгүйн тулд

гэрлээ хумихгүйн тулд

Аяа, бас амьдралд цочирдохгүйн тулд

живэхгүйн тулд

сэтгэлээсээ салчихгүйн тулд

Үргэлж зүрхнээсээ инээхийн тулд

үнэнд ойр явахын тулд

үхтлээ 'амьд' байхын тулд

Өстөндөө хүртэл үүдээ цэлийтэл нээж

өвдөлт бүрийг тэсч гарахын тулд

Би шүлэг бичдэг

Надад заримдаа

үзэн ядалт хэрэг болоход

Надаас заримдаа

хүлцэл, уучлал хулжин одоход

Гэрэлт үгс, цэвэр санаа

нялх мөр бадаг тайтгарал болж

Гэнэтийн багш мэт зүг чиг болдог

Амьдаараа арьсаа өвчүүлэх чоно мэт

шархирч байхдаа ч

Амьдралыг хайрлах итгэлээ

алдахгүйн тулд

Би шүлэг бичдэг

БИ ШҮЛЭГ БИЧДЭГ!

Би шүлэг бичдэг учраас л

Би ариун

Би амьд

Би цэвэр.

Яруу найрагч Б.ГАЛСАНСҮХ - Яруу найргийн шинэчлэлийн төлөөх зуун жилийн дайн

Алтан намар. Мөнгөн сар. Хүрэл үүл.

Алтан намар.Мөнгөн сар.Хүрэл үүлсийн чөлөөнд

Архичин жүнз, яруу найрагч мэт ширээн дээр

Гүн ухаантан мэт бодлогошироход

Гэрэл мэт нохойн дуу гутрал мэт шөнөөр

Гар чийдэнтэй бүсгүй санаа алдах мэт сонсогдоход

Алтан намар. Мөнгөн сар. Хүрэл үүл.

Алтан намар.Мөнгөн сар.Хүрэл үүлсийн чөлөөнд

Амраг охин мэт лонх, гүн ухаантан мэт дарс

Яруу найрагч жүнз, сарны гэрэл мэт

Ширээн дээр зочид мэт үзэгдэж

Сонгодог зураг мэт санагдахад

Алтан намар. Мөнгөн сар. Хүрэл үүл.

Алтан намар.Мөнгөн сар.Хүрэл үүлсийн чөлөөнд

Архичин жүнз яруу найрагч мэт шүлэг уншин гуйвахад. Амтлаг болоод тансаг найрагч ширээ мэт нойрсоход.

Архины шил гүн ухаантан мэт бодлогошироход

Муур эвшээлгэх дуунд дэнлүү савчин унтархад

Мэлхий мэт ширээний цагнаас сэрүүлэгний дуу сонсогдоход

Алтан намар. Мөнгөн сар. Хүрэл үүл.

Утга зохиол судлаач, шүүмжлэгч, зохиолч, яруу найрагч П.БАТХУЯГ – Хором хормоор гэгээ нэмсээр

Хором хормоор гэгээ нэмсээр

Хорвоо бүдэг бадаг болоход би дуртай

Удалгүй шаргалтан төөнөх нарны

Улбархан гэгээнд шүлэг бичих дуртай.

Цахилдагны хөх цэцгийг уруулдаа хүргээд

Цаг хугацаатай хамт жимбүүрдэх дуртай

Явган зам борооны усанд угаагдаж тодроод

Яваад л баймаар уужран саруулсахад дуртай

Хором хормоор гэгээ нэмсээр

Хорвоо бүдэг бадаг болоход...

Шүүдэрт норсон улавчаа тайлаад

Шүлэг бичихээр суух даанч дуртай.

Зохиолч, орчуулагч, яруу найрагч Г.АЮУРЗАНА – Өнөөдрийн тухай

Өглөө сэрэхэд зуун оньсого угтсан

Өнөөдөр, магадгүй, миний сүүлчийн өдөр.

Энэ хэдэн жилд бодож явсан бүхнээ

Эцсийн удаа цэгцэлж санах өдөр.

Хэзээ ч бусдын мэдэлд ороогүй

Хэнцхэн санаа минь насанд хүрч байна.

Хэний ч хүртэж нэвтэрч бараагүй

Тэнгэрийг тэмтрээд хуруу минь хөрч байна.

Энэнээс цааш маргааш гэж байхгүй.

Энэ чинь, бурхан минь, ямар сайхан юм бэ!

Энэ л өдрийн тулд амьд явснаа

Эргэцүүлж ч амжаагүй суутал нар жаргаж байна.