Яруу найрагч, зохиолч, сэтгүүлч Б.Алтанхуягийн ээлжит бүтээл “Мууран төрхтэй хүмүүс” ном уншигчдын гар дээр тавигдаад буй. Тэрбээр “2019 оноос хойш бичсэн өгүүллэгүүдээсээ арвыг нь сонгож “Мууран төрхтэй хүмүүс” нэрийн дор эмхтгэжээ.

    Эдгээр өгүүллэгүүдийн мөр бүрт эгэл амьдралын гүнээс урган гарсан бодол, айдас, хайр, төөрөгдөл, эргэцүүлэл шингэсэн бөгөөд зохиогч уншигчдыг энгийн мэт боловч нууцлаг ертөнц рүү дагуулан орно. Хүүхдийн айдсыг хөнжил хамгаалдаг, Буддагийн гэгээрэл хүний амьдралын үнэ цэнтэй мөргөлдөж үлддэг гэх мэт  боловч үнэн бодит ойлголтууд номын өгүүлэмжийг чимнэ.

     Зохиогч өмнө нь “Муурын байшингуудын түүх”, “Эрээн муурын үхэл” зэрэг бүтээлээ уншигчдадаа хүргэж байсан бол энэ удаад уран сэтгэмжит өгүүллэгийн шинэ хүрээг нээжээ.

Орчуулагч Д.Дашмөнх “…Сэтгэл зүйн шарх, хийрхэл дунд гацалгүй, өөрийн гэсэн ертөнцөөр хүүрнэдэг нь надад лав ихэд таалагдлаа" хэмээн онцолжээ.

"...Бичнэ гэдэг амьдрал. Бидний амьдрал.  

Тийм шүү, бидний амьдрал. Гэхдээ би хэлсэн шүү дээ. Амьдрахын тулд бичнэ гэдэг л хамгийн тэнэг үйл болчихоод байна. Ер нь уран зохиол унших нь зугаатай ажил байвал л хамгийн дээр юмсанж. Зугаацаж чадаж байвал болох нь тэр. Бусдаар ямар нэгэн ашиг хонжоо, амьдралд хэрэг болох аливаа нэг хөлийн хумс, толгойн ширхэг үс хайгаад хэрэггүй. Ингэхэд манай хүүхдүүдийг аймшигт мангасаас хэн хамгаалдаг вэ?    

Аав нь... Мэдэхгүй дээ, ээж нь ч байж болох юм. Үгүй бол харанхуйгаас мангасыг нь оргүй хөөчихдөг гэрлийн чийдэн ч юм уу?  

Үгүй дээ, хайрт минь. Огт үгүй шүү. Тэднийг хөнжил нь хамгаалдаг юм. Хүүхэд харанхуйгаас айхаараа хөнжлөө толгой дээгүүрээ битүүлээд л аврагдчихдаг. Тэдэнд хэн ч зааж өгөөгүй, өөрсдийн зөнгөөрөө л ингэдэг..."

-"УУЧЛААРАЙ! САНДЛЫН ДЭРГЭД  ХАРХ" ӨГҮҮЛЛЭГИЙН ХЭСГЭЭС...