Энэхүү ном нь Шекспирийн бүтээлд хандах аргын талаар найруулагч, багш, жүжигчдэд зориулсан зөвлөмж бөгөөд зургаан агуулгаас бүрдэж байна. Эхлэл хэсэгт жүжгийн сонголт, гол үзэл санаа боловсруулах, шийдэл гаргах, ложистик, эх зохиол танах, хянан засварлах тухай оруулсан байна. Харин дараа нь түүний тоглолтын баг бүрдүүлэлт, хэл, орчуулга, хамтын ажиллагаа, сургуулилтын үйл явц гэсэн хэсгүүд багтжээ.

        Тус номын зохиогч профессор Леон Рубин “...Миний бичсэн энэхүү ном жүжигчин, найруулагч нарт Шекспирийн бичсэн олон жүжиг дээр ажиллах янз бүрийн арга замыг судалж, жүжгийн ээдрээтэй үг хэллэг, шүлгүүдийн далд утгыг тайлж, давхар санааг нээж өгөхөд тус болно. Шекспирийн зохиолуудад сэтгэл хөдлөл, гүн ухааны үзэл санаа нэвт шингэсэн байдаг тул дүрүүдийн хэл яриа, үйл хөдлөлийн өрнөл, тайлал нь баялаг, ярвигтай бөгөөд хэмнэл, өнгө аяс нь байнга өөрчлөгддөг. Түүний ихэнх жүжигт улс төр, хошигнол, эмгэнэлийн шинжтэй сэдвүүд хоорондоо холилдон хоршин оршдог. Орчин үеийн жүжигчин, найруулагч нар Шекспирийн жүжгүүдийг тайзнаа тавихдаа нягт бичвэрийн утга санааг гүнзгий ойлгож, зөв тайлбарлаж, орчин үеийн үзэгчдийн сэтгэлийн угт хүрэх арга замыг хайж олох хэрэгтэй. Жүжгүүд нь тавигдаж буй хэл соёлын орон зай, бодит орчин бүрдээ амьд байх ёстой. Тайзны бүтээл бүр нь жүжгийг амилуулан үзэгчидтэй харилцан ярих, тэдний сэтгэхүйн гүнд нэвтрэх үүдийг нээх ёстой, тайзны бүтээлийг музейн үзмэр мэт болгож болохгүй...” гэжээ.

Мөн эл номын театрын мэргэжлийн редактороор ажилласан багш нар номд өөрсдийн өмнөтгөл үгээ багтаажээ.

       СУИС-ийн ТУС-ийн найруулах, жүжиглэх уран чадварын тэнхимийн багш Я.Билгүүнсар “...Найруулагч, зохиолч, судлаач, багш Леон Руби хэмээх эрхмийн энэхүү бүтээл бүрэлдэх шатлалын зургийг гаргаж, амжилттай уран бүтээл болгоход чиглэсэн дасгалууд, анхаарвал зохих зүйлсийг санал болгосон байна. Онцгойлон чухалд тооцон авч үзэх агуулга бол жүжгийг хэрхэн орчуулах, Шекспирийн бүтээлүүдийг орчуулахад юунд анхаарах хийгээд найруулагч, жүжигчин, тайзны зураач мэргэжлээр суралцагчид болон мэргэжлийн уран бүтээлчдэд орчуулгын зохиолтой ажиллахдаа зохиолын эх хувилбар болон тухайн сэдэв дагуух олон улсын судалгааны бүтээлүүдтэй хэрхэн харилцахыг, хэрхэн амжилттай ажиллахыг дэлгэрэнгүй өгүүлжээ...” гэсэн байна.

        СУИС-ийн ТУС-ийн ярих урлаг, театр кино судлалын тэнхимийн багш С.Баатарцогт “...Сайн найруулагч сонгодог жүжгийн зохиолыг задлахдаа мэргэжлийн судлаач, шүүмжлэгчийн нэгэн адил гярхай, эх зохиолтой нягт нямбай хэрхэн тулж ажилладагийг харилцан яриаг дүрийн онцлог, зан төрхөд уялдуулан хэрхэн шинжилснээс бэлээхэн мэдэж болно. Бас эх зохиолын харилцан яриаг үзэгдэл, бүлэг тус бүрд задалсан нь түүний уран бүтээлд хандах хандлага, найруулагчийн эрэл хайгуулыг нь хангалттай харуулж байна... “ гэж тодотгосон байна.

Түүнчлэн номын оршил хэсэгт “Шекспир өөрөө “Гамлет”-д тоглох жүжигчдэд үг яриагаа хүнд хүргэх талаар хамгийн сайн зөвлөгөө өгдөг” гэж онцолжээ.

  “Шекспирийн жүжгийн сургуулилт” ном зохиогч Леон Рубиний хүүрнэлээр хөврөх бөгөөд унших явцад сонирхолтой хэсгүүд ч олон дайралдаж байна. Тухайлбал, номын эхэн хэсэгт “Жүжгийн сонголт” гэсэн гарчиг дор “...Хэвлэлд ярилцлага өгөх үед, мөн манай оюутнууд “Таны хамгийн дуртай Шекспирийн жүжиг юу вэ” гэж надаас байнга асуудаг бөгөөд миний сонирхол байнга өөрчлөгддөг тул би хэзээ ч тодорхой хариулж чаддаггүй. Үнэнийг хэлэхэд, тэр үед миний ой тоонд хэчнээн олон жүжиг хөвж байсан ч, тухайн үед миний барьж авсан жүжиг бол миний хамгийн дуртай зүйл болж хувирдаг...” гэжээ.