ХАЙРЫН СҮМЭЭС ДҮРВЭГСЭД

2025-03-31, 494

Яруу найрагч, зохиолч Л.Өлзийтөгсийн “Хайрын сүмээс дүрвэгсэд” роман ном уншигчдын хүртээл болсон. Тэрбээр 1995 оноос “Тэргүүн бүлэг”, “Тэнгэрт ургадаг модод”, “Эрх чөлөөтэй байхын урлаг”, “Ганцаардлын дасгал”, “Нүдний шилэнд үлдсэн зургууд”, “Миний гунигийн түүх”, “Төсөөллийн өрөөнд”, “Үзэхийн хязгаар”, “Хотын үлгэрүүд”, “Толинд туссан Будда”, “Хараацай зогсолт” /2 боть/, “Салхины нэр Ө” хэмээх ном хэвлүүлсэн байдаг.

Шинэ роман нь гурван бүлэгтэй, хайр сэтгэлийн өгүүлэмжтэй бүтээл байна. Нэгдүгээр бүлэг нь "Мэнгэ". Түүн дотроо "Урагдсан дэвтэр буюу Мандаагийн өдрийн тэмдэглэлээс". Харин хоёрдугаар бүлэг нь "Сорви". Энэ бүлэгтээ тэрбээр "Бов бор хүүрнэл буюу өнгөрсөн цагийн сан...сэн...сон...". Гуравдугаар бүлгийн нэр нь "Шарх" бөгөөд "Эмээ бид хоёр" ба "Тэр хоёр" 14 наст ахмадын өдрийн тэмдэглэлээс" гэсэн гурван бүлгээс бүрджээ.

Тус номд гэр бүл, нийгмээс авдаг шарх, дотоод сэтгэлийн нууцууд, ил ба далд нүүр царай, эрэгтэй, эмэгтэй хүмүүсийн амьдралд хандах ялгаатай хандлага зэрэг олон сэдвийг зангидан бүтээжээ.

Ингээд тус номын эхэнд өгүүлэх "Урагдсан дэвтэр буюу Мандаагийн өдрийн тэмдэглэлээс" хэсгээс уншигч танд хүргэж байна.

"...Ээжийнхээ хэвлийд байхдаа л тасан хар царайтай, цусан улаан нүдтэй төрөхөөр шийдсэн үзээрийн Бор тэр өдөр цүнхийг минь булааж аваад, ухаж төнхөж байхад нь нүүдлийн машин ирсэн юм л даа. Цүнхээ буцааж авахаар чадлаараа тэмцсэн ч нэгэнт дийлэхгүй учир мань нь түүний баруун ханцуйнаас тас зуурчихсан байсан юм. Гэвч хэн хэн маань Нарыг гөлрөөд л таг болцгоосон нь мэдээж. Миний зүрх ч бас шинэ охиныг харангуутаа чанга чанга цохилоод ирсэн нь үнэн. Хүлээн зөвшөөрсү! Гэхдээ л, боовон Борын, буг чөтгөр ч дийлэмгүй, алх бахь шиг төмөр гар гэнэтхэн л, нэг л сонин сулбагас гээд явчихсанд үнэ-ээ-ээр их гайхсан шүү. Үнэ-ээ-ээр!!!!!!

Айлууд ихэвчлэн өглөө юм уу өдрийн цагаар нүүж ирдэг дээ. Гэтэл тэднийх орой болж байхад ирсэн. Бараг л нар жаргах гэж байхад. Харин, шинэ охин эмээгийнхээ араас цухуйхад хэзээ ч жаргадаггүй нар манай гудамжинд үүрд мандсан даа..."

ХАЙРЫН СҮМЭЭС ДҮРВЭГСЭД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.