Залуу зохиолч, сэтгүүлч Н.Пүрэвсүрэнгийн “Ариун булаг”  кино туужийг уншигч танд танилцуулж байна. Зарим нь магадгүй түүний эл номтой хэдийнэ танилцсан байх. Тэрбээр номынхоо тухай “ Ном бүхэлдээ нэгэн цаг үед найзалж нөхөрлөж яваа хүүхдүүдийн тухай өгүүлнэ, алдаа оноотойгоо, баяр гунигтайгаар, хайр дурлалтайгаа. Цагийн аясаар амьдралтай нүүр тулж, энэ нийгэм цагийн аясад өөр өөрсдийн амьдралыг бүтээжээ. Тэдний сэтгэлд найз гэх нандин холбоо, хайр гэх хүслийн холбоо бий” гэсэн байна.

     Харин түүний энэхүү номын өмнөтгөлд Д.Нацагдоржийн шагналт зохиолч, яруу найрагч П.Нямлхагва “Н.Пүрэвсүрэнгийн энэхүү кино туужид өсвөр үеийнхний гэнэн цайлган хайр сэтгэл, хувирашгүй нандин сэтгэл, хүн чанар, алдаа, оноо, зөв төлөвшлийг энгүүн сайхнаар нээн үзүүлэхийг зорьсон байна. 2000 оны үеэс нөхөрлөж, хар багаасаа бие биенээ таньсан сэтгэлийн их гэгээгээр өнөөдрийг хүрсэн найзуудын амьдралыг харуулснаар тухайн цаг үед хүүхдүүд хэрхэн өсөн торниж байгааг тод томруун харуулжээ” гэж өгүүлжээ. Номд өгүүлснээр “Хүсэл хүслийн дотроос хайр хамгийн хүчтэй нь, хайр гэдэг үргэлж ундрах сэтгэлийн ариун булаг билээ...”, “Өтөл хойноо ч сэтгэлээ цатгах

Өегхөн дурсамжаа бүтээж амьдраарай...” гэхчлэн эшлэлүүд уншигчийг хөтлөх бөгөөд туужийн гол санаа эл үгсэд оршиж байгаа аж.

    Энэхүү туужийн гол дүр болох Тэргэл “Амьдралын минь насан туршийн нөхөд минь. Ахиад олдохгүй найзууд минь. Буруу зөрүү ойлголцож гомдож тунихдаа ч хэн хэндээ хатуу үг хэлж үзээгүй миний найзууд. Жаргал, зовлонгийн алинд ч хамтдаа шүү” гэж төгсгөл хэсэгт боддог байна.  Ийн ухаарч, бодож, найзуудаа улам илүү хайрлахын хүсэл төрөх хүртэл тэдэнд чухам юу тохиолдож, тэдний хооронд ямар харилцаа үүсэж, тэд хэрхэн даван туулсан болон өөрсдөдөө тулгарч буй асуудлыг хэрхэн шийдэж буйг энэ туужаас унших юм.

       Мөн туужид "Цаг хугацаа харвасан сум шиг өнгөрөх ажээ. Саяхан л тоглон наадаж, алдахдаа алдаж, онохдоо онож, амьдралтайгаа хэний ч заавар зөвлөмж, бас хэний ч туслалцаагүйгээр хөл тавьж байсан найзууд хэдийнэ аав, ээж болж, амьдралаа босгожээ..." гэх хэсэг байна. Эрхгүй багаас ижил дасал болсон найзууд, ангийнхнаа бодлоо. Нээрээ л бид саяхан л жаахан хүүхдүүд хөтлөлцөөд хичээлдээ явдаг байсан сан. Гэтэл өнөөдөр цөм ажил, мэргэжил эзэмшиж, аав, ээж болчихсон байна. Үнэхээр ч цаг хугацаа харвасан сум шиг гэдгээ бидний танил дотно бүхний өөрчлөлтөөр тод томруу харуулдаг даа. Тэгэхээр энэ номыг ганц өсвөр насныхан ч биш бүх насныхан уншвал болох юм байна. Хэдий насанд хүрсэн ч анхны хайр, анхны гэсэн бүхэндээ эргэн очиж, гэгээн дурсамжаараа аялж, амьдралынхаа хамгийн жаргалтай, гэгээн өдрүүдэд "зочилж", өөрийгөө тэртээх бага наснаас өнөөдрийг хүртэл ямар хүн болж өсөж, төлөвшиж, өнөөдөр хэн болон алхаж яваагаа бодон цэгнэж, эргэн харах юм байна. Үүгээрээ баялаг өргөн агуулгатай, өгөөж дүүрэн бүтээл ажээ. Уншигч та түүний номд саатаж, түүний дүрүүдийн тухай шимтэн уншаарай.