Дэлхийг доргиож, Володимир Зеленскийг удирдагч болгосон хандлагын бодит түүхийн тухай өгүүлэх Саймон Шустерын “Тайзны тоглогч” номыг орчуулагч Т.Жаргалсайхан англи хэлнээс орчуулжээ. Тус ном дөрвөн бүлгээс бүрдэх бөгөөд мөн нэмэлтээр төгсгөлийн үг, талархал, эх сурвалжийн тэмдэглэл, индекс гэх хэсгээс бүрджээ.

          Тус номын оршлын хэсгээс уншигч танд хүргэе.

“2019 оны хавар хошин шогийн тоглолтын тайзны ард анх уулзахад олж үзсэн Володимир Зеленскийн тэр шөнийнх шиг айсан төрхийг багагүй хугацааны дараа дахин харж билээ. Эл төрх тоглолтын өмнө тэвдүүлдэг тайзны айдас төдийхөн бус байжээ. Тэрхүү шөнө ёслолын хослолтой Зеленский эргэн тойрон дахь хүмүүс, дуу шуугианыг огтоос анзаарсан шинжгүй шал гөлрөн зогсохдоо айснаасаа болж хөмхийгөө зууж, хэлээ залгичихсан мэт л байсан авай. Украины Ерөнхийлөгч болно гэдгээ зарлаад гурван сар өнгөрч байсн тэрээр нэг цаг хүрэхгүй хугацааны дараа шинэ тоглолтоо нээх гэж буй нь энэ. Ер бусын ший жүжгээ дэглэж, гол дүрээ бүтээх түүнийг сая сая хүн өөрийнх нь сонгосон хэрэгсэл болох зурагтаар шууд үзнэ...

Одоо харин “Тайзны тоглогч” номоос зарим эшлэлийг хүргэж байна.

• Хэвлэл мэдээллийнхэн түүнийг хэзээ ч уучлаагүй билээ. Дайны үеийн Ерөнхийлөгч болсон тэр өдөр хүртэл шүүмжлэлд овоо дархлаатай Зеленскийд сэтгүүлч нар телевизийн замналд хамгийн алдартай мөрийг нь сануулах тун их дуртай байлаа.
• Тэрээр хожим “сэтгэл санааны хувьд тэр яг л гитарын чавхдас шиг мэдрэлийн судаснууд нь юу юугүй хагарах нь уу гэлтэй байдгаараа гүрдийчихсэн байсан” гэж дурсжээ.
• Зеленскийн намтарт зугтахгүй гэсэн баталгаа өгөх нэг ч мөр байхгүй.

​

• Ерөнхийлөгч өөрийнхөө хувьд гэр бүлээ нүүлгэн шилжүүлэх нь зүйтэй гэж үзжээ. Гэр орон нь бөмбөгдүүлэх магадлал тун их тул гэр бүлийнхээ аюулгүй байдалд өөрийнхөөсөө илүү хатуу шаардлага тавьжээ.
• Халдлагын эхний хэдэн өдөр хачин жигтэй холион бантан болж, Олена Зеленскад цөхрөх ч завдал олгосонгүй. Нэг ёсондоо хүүхдүүдээ бодсондоо, нөгөөтээгүүр сурсан зангаараа сэргэлэн цовоо байхыг хичээнэ.
• 2003 онд анхны хүүхдээ төрөхөд Зеленский аль хэдийнэ олны танил болсон байлаа.
• Зеленский бол өөрчлөлтийн эрин үеийн бүтээгдэхүүн.
• Зеленский болон түүний Засгийн газар зэвсэг гуйж, ирсэн үед нь тэмдэглэж байсан ч Оросын заналхийллийг үгүйсгэсэн хэвээр.
• Зеленский Салливантай уулзсан өдрийн орой зурагтаар “Тэд хүмүүсийг үхэл рүү нь илгээхээр цуглуулаад л байна” гэж хэлсэн юм.
• Ерөнхийлөгчийн хувьд миний зорилго бол энэ мөчлөгийг эцэслэх, залуу байхдаа ойлгож чадаагүй дарангуйллын зүй тогтлыг зогсоох хэмээн өгүүлэх Зеленскийн төлөвлөгөө дан ганц зэр зэвсгээс үл хамаарна.