МЗЭ-ийн шагналт яруу найрагч Б.Оролзодын нэрэмжит “Тогоруутай нуурын айзам” анхны номын уралдаан уралдааныг 18-30 насны залуу яруу найрагчдын дунд зарлажээ.  Уралдаанд оролцогчид арванхоёрдугаар сарын 17-ныг хүртэл таван хэвлэлийн хуудаснаас илүүгүй яруу найргийн номын эхээ [email protected], [email protected] цахим хаягаар илгээх аж. “Тогоруутай нуурын айзам” уралдааныг МЗЭ-ийн Яруу найргийн үндэсний төв, Судлал шүүмжийн үндэсний төвийн гишүүдээс бүрдсэн шүүгчдийн бүрэлдэхүүн шүүн явуулах юм байна.

МЗЭ-ийн шагналт яруу найрагч Б.Оролзод 1985 оны долдугаар сарын 23-нд Төв аймгийн Өндөрширээт суманд төрсөн. Тэрээр 1993-2001 онд төрөлх Өндөрширээт сумынхаа найман жилийн дунд сургууль, 2001-2003 онд Лүн сумын ерөнхий боловсролын сургуульд сурч, төгсжээ. Улмаар 2003-2007 онд Их Монгол дээд сургуулийг Утга зохиолын ажилтан, сэтгүүлч мэргэжлээр дүүргэж, 2011 онд Монголын Сэтгүүл зүйн академийг радио сэтгүүл зүй, 2012 онд Улс төр, менежментийг академийг төрийн удирдлага, захиргааны чиглэлээр дүүргэсэн.

                              Тэрээр 2007 оноос “Өглөөний сонин”-д сэтгүүлч, “Монголын жигүүртэн амьтдыг хамгаалах нийгэмлэг”-ийн тэргүүн, “Шинэ Монгол” радиод сэтгүүлчээр ажиллаж байгаад 2012-2016 онд Төв аймгийн Өндөрширээт сумын Засаг даргын орлогч, 2016 оноос сумын Иргэдийн төлөөлөгчдийн хурлын даргын албыг нэр төртэй хашиж байгаад 2019 оны аравдугаар сарын 5-нд зуурдаар нас барсан билээ. Б.Оролзод нь “Шүлэгтэй навчис” 2009/, “Ширээтийн суурин” /2017/ зэрэг яруу найргийн ном хэвлүүлж уншигчдын хүртээл болгосон төдийгүй “Тогоруутай нуур”, “Чинийхээ дэргэдээс холдмооргүй байна” тэргүүт олон дуу бүтээсэн үзэгч, сонсогчдынхоо хайр, хүндэтгэлийг хүлээсэн нэгэн байв.