ҮЗЭГ НИЙТЛЭЛ ХОЁР НАМАЙГ БҮҮВЭЙЛЖ ӨНӨӨГИЙН ЗЭРЭГТ ХҮРГЭСЭН НАСАН ЗАЯАНЫ ТАЙЛАН

        Монгол Улсын Хөдөлмөрийн баатар, Соёлын гавьяат зүтгэлтэн, нэрт сэтгүүлч Хорлоогийн Цэвлээгийн “Үзэг бидэн хоёр” ном хэвлэлтээс гарлаа. “Социалист аж төрх ёс”, “Амьдрал бидэн хоёр”, “Хэнзхэн сарнайн өчил”, “Зүрхний бичээс”, “Дээлтэй судар”, “Хангайн нуруу шиг хүмүүс”, “Өвөөгийн жор”, “Ээж бидэн хоёр”, “Нийтлэлийн тухай яриа” , “Өвөөгийн жор”,  “Хоточ цагаан банхар”, “Нандин ээж” тэргүүтэй 47 гаруй ном бүтээл хэвлүүлжээ.

Нэрт сэтгүүлч Х.Цэвлээгийн “Үзэг бидэн хоёр” ном нь нийт хоёр бүлэг, зургаан дэд бүлгээс бүтжээ.

Тэргүүн бүлэг: Миний тухай хөөрөлдөөн

       Хөдөлмөрийн баатар Хорлоогийн Цэвлээтэй хийсэн сэтгүүлч Т.Баасанхүү, Д.Батмөнх, Д.Цэнджав, Б.Өвгөнхүү, Я.Сумъяа нарын  ярилцлага энэ бүлэгт багтжээ. Тэрбээр сэтгүүлч Т.Баасанхүүд өгсөн ярилцлагадаа “Сэтгүүлч хүний бүтээл улсыг улс болгодог, сэтгүүл зүй нь өөрөө сэтгүүлчийг хүн болгодог ийм хуультай юм. Хүн болж байж улсаа жинхэнэ үзэл санаагаараа удирдах тэр хэмжээнд хүрнэ. Сэтгүүлч хүн гэдэг “миний араас Монгол Улс бүхэлдээ явж байгаа” гэж бодож явах ёстой юм. “Миний энэ нийтлэлээр тэр нөхрийг ажлаас нь хална” гэж бодож нийтэлж ерөөсөө болохгүй. Хална уу, байна уу тэр чинь тэр нийгмийн асуудал. Тэдний өөрсдийнх нь асуудал. Харин тэрнийг тойрсон тэр ерөнхий нөхцөл байдлыг л үнэн мөнөөр нь гаргаж тавих ёстой. Энийг одоо аналитик буюу шинжлэх сэтгүүл зүй гээд байгаа юм уу даа, хоёр дахь сэтгүүл зүй. Өөрөөр хэлбэр анхдагч мэдээнээс  шинжлэлт мэдээ гарч ирнэ. Сэтгүүлчдэдээ миний нэг хэлэх дуртай үг байдаг, юу гэхээр “Сэтгүүлч бол хуучирдаггүй мэргэжил. Сэтгүүлч бол тэтгэвэрт гардаггүй мэргэжил. Сэтгүүлч бол үхдэггүй мэргэжил, мөнхийн мэргэжил. Өөрөө нүд аньсан ч үзэл санаа нь өөр бусдаар дамжин яваад байдаг” хэмээн тодотгожээ.

Хоёрдугаар бүлэг:

     “Үзэг бидэн хоёр” номын  хоёрдугаар бүлэгт нэрт сэтгүүлчийн “Ухрах хугацаа алга”, “Монголын ардчилалд нэг юм дутаж байна”, “Хорины өдөр”, “Цагаан монгол, ногоон дэлхий”,  “Амилсан бурхад”, “ Элээ шувууны сүүдрээс эмээхүй”, “Малчны улс”, “Ховор хүмүүс”, “Үнэн дээр тогтдог нь хорвоогийн жам”, “Ондоо хүн” тэргүүтэй шилдэг нийтлэл, хөрөг, тэмдэглэл багтжээ. Хөдөлмөрийн баатар, нэрт сэтгүүлч Х.Цэвлээгийн “Үзэг бидэн хоёр” номоос онцлох 10 эшлэлийг хүргэж байна.

Хүн гэдэг амьтан гарамгай хэдий ч эрийн сайнд биш, эх дэлхийн хүчинд ургадаг нэгэн төрлийг ургамал юм сан жээ.

Би...хоёр эзний ганц зарц юм. Сайх хоёрын нэг нь сэтгэл-эзэн, нөгөө нь ухаан-эзэн, Сэтгэл-эзэн минь хүн байхыг шаардана. Ухаан-эзэн минь мөнгөтэй байхыг шаардана.

Ээжийгээ хайрлахад маргааш гэж байдаггүй.

Сэтгэл гэдэг түүхий сүү шиг цагаан, бас түүн шиг амархан гашилдаг.

Ядуурал бол нийгмийг хамарсан тансаг хэрэглээний төлөө өрсөлдөөний нэгэн том золиос мөн.

Сагсуурал, залхуурал, тансаглал гурав бол манай өгсөн дээшлэх замд тохиолдож байгаа гурвалсан сүүдэр мөн.

Хайрлах гэдэг нь хамгаалахын нэр. Хамгаална гэдэг нь хайрлахын нөгөө утга.

Хайр хэтрэхээрээ хардаж, харамлахын зовлонд унадаг ажгуу.

Хачин хүн, харамч хүн сэтгүүлч болдог. Чих, нүд, ухаанаа, сэтгэлээ харамладаггүй хүн  сэтгүүлч болдог.

Гүний ёроолыг тэмтэр, уртын үзүүрийг мэдэр. Өндрийн оргилыг ажигла, өнцгийг өөрөөр хар. Тэр цагт Та сэтгүүлч ээ..