Номын баяраас онцлох ЗУРГААН ШИНЭ НОМ

Д. Бямбасүрэн:
Соёл урлаг- Уран зохиол

2023-05-27, 1861

Эргэлт.мн мэдээллийн сайт номын баяраас дараах зургаан номыг онцлон хүргэж байна.

-ХОРИГ УУЛЫН ЭРДЭНЭС-

Дөрвөн өдрийн өмнө нээлтээ хийсэн "Хориг уулын эрдэнэс" номыг бид эхэнд онцолж байна. Монголын Үндэсний музей, Соёлын өвийн үндэсний төв хамтран тус номыг эрхлэн гаргажээ.

Хөвсгөл аймгийн нутаг Дархадын хотгор нь үзэсгэлэнт байгаль, өвөрмөц түүх, соёлын дурсгалаар баялаг билээ. Тус газарт Монголын эзэнт гүрний үеийн “Их хориг” буюу язгууртнуудын оршуулгын 68 дурсгал байсныг тонуулчид тонон сүйтгэсэн. Уг мэдээг судлаачид нутгийн иргэдээс 2017 онд мэдэж 2018-2020 он хүртэл тухайн дурсгалт газар үлдэж хоцорсон олдворуудыг авран хамгаалах судалгаа хийсэн аж. Ийнхүү 170 гаруй олдворыг Чингис хаан үндэсний музейд хадгалахаар болж, олвор, үзмэрийн тухай уг номыг хэвлүүлсэн байна.

-Б.ГАНГААМАА-

"Монсудар" хэвлэлийн газрын хүүхдийн номын Жангар редакцаас монголын түүхэн дэх гайхалтай хүмүүсийн тухай намтарчилсан зурагт номыг цувралаар гаргаж байгаа билээ. Энэ хүрээнд “Монгол хүн” цувралын дараагийн дугаар болох Б.Гангаамаа ном гарсан нь Үндэсний номын баярын онцлох номын нэг болж байна. Монгол Улсын Уулын спортын Гавьяат тамирчин, ОУХМ, Дэлхийн долоон ноён оргилд гарсан анхны Монгол хүн SEVEN SUMMITEER, Дэлхийн зулай Эверест болон K2 оргилд гарсан анхны Монгол эмэгтэй болох Бадамгаравын Гангаамаагийн амьдралын түүх, өдийг хүртэлх амжилтын замыг эл номд багтаажээ.

-ТЭНГЭРТ ХӨӨРӨХ ЦААСАН ШУВУУ-

Мөн "Монсудар" хэвлэлийн газрын хүүхдийн номын Жангар редакцаас энэ онд “Монсудар зурагт ном” хэмээх цувралыг эхлүүлж байгаа. Үүний хоёр дахь цуврал болох “Тэнгэр хөөрөх цаасан шувуу” номыг мөн онцолж байна. Тус номын зохиолыг залуу яруу найрагч, сэтгүүлч М. Дэвээжаргал бичиж, хүүхдийн номын зураач М. Алтаншагай зургийг нь зурсан байна. Эргэн сануулахад, энэ цувралын эхлэл болж “Ув улаан зүрх” хэмээх ном хэвлэгдэн гарсан бөгөөд номын зохиолчоор А.Даваасүрэн, зураачаар нь Э. Базаррагчаа нар ажилласан юм.

-ТАРГАН МУУР-

Дараагийн онцлох ном бол яруу найрагч Б.Батзаяагийн "Тарган муур" тууж. Тэрбээр эл зохиолоороо өнөө цагийн залуусын дотоод зөрчил, хотжилтыг даган илэрч буй хувь хүний сэтгэлзүйн асуудал, эрэгтэй эмэгтэй хүмүүсийн дотоод ертөнц дэх хүйсийн ойлголтууд хэрхэн өөрчлөгдөж буйг уудлан үзүүлэхийг зорьжээ. Энэхүү туужид хөгжимчин эмэгтэй, зохиолч эрэгтэй хоёр өнцгөөс нэгэн зэрэг хүүрнэх ухамсрын урсгалаар өрнөх зуураа далд ухамсар, төсөөлөл, зүүд совин зэргээр дамжуулан "Нөгөөгийнхөө цуурай мөн үү" гэсэн асуултад хариулт хайж байгаа аж.

-СҮНСНИЙ НӨГӨӨ ТАЛ-

Яруу найрагч Б.Алтанхуягийн "Сүнсний нөгөө тал" номыг мөн онцлон хүргэж байна. Тус номын хавтасны зургийг зураач Б.Төрмөнх зурсан бол редактораар нь О.Элбэгтөгс ажиллажээ. Тэрбээр энэхүү номынхоо талаар "...Миний хэлэх гээд байгаа санаа бол яруу найргийг уншиж хүртсэн уншигч оюун санаандаа ямар нэгэн ид шидийг бүтээж, төсөөллийн ертөнцөө бий болгож байдаг, тэрхүү төсөөллийн ертөнцийнхөө дутуу хэсгүүдийг тухайн яруу найрагчийнхаа, эсвэл өөр яруу найрагчийн шүлгүүдээс бүрдүүлэх замаар цогц ертөнцөө сая бүрдүүлдэг. Тэгж цогц ертөнцөө бүтээсэн хүмүүс амьдралыг арай өөрөөр харж чаддаг байх. Ерөөс тийм цогц ертөнцийг бүтээх нь тун ховор. Бүтээж чадсан цөөн хүмүүс нь юуг ч хийсэн бай гайхамшгийг л үлдээдэг нь жам" хэмээж.

-БҮРЭГ ДАСАЛ ҮГС-

Мөн дараагийн онцлох номын нэг бол яруу найрагч Ө.Балжиннямын "Бүрэг дасал" ном. Бүрэг дасал үгс, бүрэг шувууд, бүрэг саарал тэнгэр, бүрэг зүүд, бүрэг навчис, бүрэг ичимхий харц...гээд бүгдийг өөрийн мэдрэмж, илэрхийллээр анирдсан түүний шинэ номын ертөнцөөр мөн аялаарай.

"Гавьтай үгээр сэтгэлийг нь засаж дөнгөхгүй ч

Ганьхарсан сүүдэрт нь ганцаардсан сүүдрээ зэрэгцүүлж алхах сан...”

Номын баяраас онцлох ЗУРГААН ШИНЭ НОМ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид