“Салхи дуудан жиргэлээ” яруу найргийн номын нээлт энэ сарын 12-ны өдөр болж өндөрлөлөө. Уг ном сэтгүүлч Л.Цэрэнжаргалын яруу найргийн төрлөөр бүтээж байгаа анхны ном бөгөөд тус номын редактораар МЗЭ-ийн Яруу найргийн төвийн тэргүүн Н.Минжинсайхан, “Болор цом”-ын эзэн яруу найрагч О.Цэнд-Аюуш нар ажиллаж, хавтасны зургийг нь “Болор цом”-ын эзэн яруу найрагч, зураач М.Амархүү зуржээ.

Уншигч танд “Салхи дуудан жиргэлээ” номоос таван шүлэг онцлон хүргэж байна.

ГӨХӨЛДЭЙ ХАЙРХАН

Хайрт аав Л.Лувсанцэрэндээ

Адууны дэл шиг асгарсан модтой хайрхан минь

Аялгуу салхины үзүүр нь зөөлөн юм

Аргалын эвэр шиг дүнхийсэн хадтай хайрхан минь

Аавын минь нөмөр шиг дулаахан юм

Сунаж мөргөсөн түмний минь шүтээн

Суутай өвгөдийн онголсон оргил

Гөхөл сүүлийг нь боосон адууны шүтээнтэй

Гөхөлдэй хайрхан миний аавын уул

Жаргахад нүдэнд харагдаад байдаг уул

Зовоход нүдэнд үзэгдээд байдаг уул

Унтах нойронд нүүж ирдэг уул

Уйлах нүдэнд аргадаж ирдэг уул

Нутгийн минь уул, ээжийн минь уул

Нутгийн минь уул, аавын минь уул

Хүлгээн эцээн очдог бурхдын уул

Хүүгээ цэцэн гэж боддог буурлын уул

Миний Гөхөлдэй хайрхан уул

БОР ЗҮРХ

Дотнын анд Б.Оролзодын гэгээн дурсгалд

Зурсан шүдэнзний галаар

Шүлэг бичсэн анд минь

Зуугуул үүлсийн араншингаар

Оршихуйг тольдсон нөхөр минь

Будан ороолдсон уулсын

Нар аргамжсан сүүдэр минь

Бурхны өгсөн зараалыг

Богиноор хэмжсэн амь минь

Чөдөртэй морины чимээнд

Хамт хононо гэсэн чинь яалаа!

Судартай уулын овоонд

Хамт мөргөнө гэсэн чинь яалаа!

Зээрэн салхи шиг өдрүүдийг

Хамт туулна гэсэн чинь яалаа!

Зовлон ижилхэн хоёр хүүгээ

Нөхөрлүүлнэ гэсэн чинь яалаа!

Үргэлжлэл болсон хүүг чинь

Үсэн бууралтталаа хайрлана

Үргэсэн зээр хараад

Шүлэг найргийг чинь бодно

Томоогүй гэнэн насаа

Хэлхэлдэж өнгөрөөснөө дурсан

Тогоруутай нуурын эрэгт сууна аа, сууна

Аманд тэгэхэд ямар дуу аялагдахыг

Анд минь чи мэдэж л байгаа

Дууг чинь дуулж суухдаа

Хундагыг чинь дүүргээд

Дутуу сэтгэлийн алс руу

Хөнтөрч орхилоо

Баяртай анд минь

ЧИ БИДЭН ХОЁР

Хайрт хань Т.Мягмарсүрэндээ

Гандсан тэрлэг шиг намраар

Ганцхан чамайгаа л хайрлана...

Өнжсөн хун шиг өвлөөр

Ганцхан чамайгаа л хайрлана...

Амаржсан эх шиг хавраар

Ганцхан чамайгаа л хайрлана...

Аяа... он жилүүд гэдэг чинь

Дөрвөн улирал шүү дээ...

Аяа... одоо хийгээд ирээдүй гэдэг чинь

Чи бидэн хоёр шүү дээ...

ГАЙХАМШИГТ НЭГЭН СИМФОНИ

Хатан Туулын мөнгөлөг долгио нь

Харц нь талимаарсан бүсгүйн уран бэлхүүс адил

Хээрийн задгай салхи нь аниргүйн талыг сэрээж

Хэн нэгний нялх инээдийг зураглана

Түрлэг ихтэй их усны дэргэд

Түүний үнэр, инээд содон байсныг би мэднэ

Сүрэглэж нисэх шувуудын дуу шиг

Сөл өвс намуухан гундахыг ч би мэднэ

Гарыг нь атгаад гүүрэн дээгүүр алхахад

Гайхамшигт нэгэн симфонийг голын харгиа тоглоно

Талын салхитай хослох хайрын тэр аялгууг

Түүний инээд гэж бодохоор сэтгэлийн манан арилна

Тэнгэрийн оддыг тоолсоор зүүдний хязгаарт аялахад

Тэвэрт ирэхгүй түүнийг дэмий л баахан бодно

Хөрвөөж хөрвөөж хоносон үүр шөнийн заагаар

Хүний алаг үр зүүдний үүд сэм татна...

ҮЗЭСГЭЛЭН ГОО – ЯРУУ НАЙРАГЧИЙГ

Ямархан энгийн бүсгүйг

Яруу найрагч эгэлгүй хэмээж

Инээмсэглэлийг нь солонго болгож

Итгэлийг нь нар мэт гэрэлтүүлнэ

Ямар ч амтгүй уруулыг

Яруу найрагч л жимс хэмээж

Эгэл даруухан түүнийг мөрөөдөн

Энэ сэтгэлээ тэнгис болгодог

Үгийн хүч яруу найрагчаар амилж

Үнэнийг асааж, худлыг унтраадаг

Үгүй бүхнийг яруу найрагч дүүргэдэг ч

Үзэсгэлэн гоо л яруу найрагчийг сөхрүүлдэг...

ЗОХИОГЧИЙН ТУХАЙ:

Сэтгүүлч Л.Цэрэнжаргал 1985 онд Булган аймгийн Хишиг-Өндөр суманд төрсөн. Тэрбээр

• 2003 онд Хишиг-Өндөр сумын ерөнхий боловсролын сургууль,
• 2007 онд “Их Монгол” дээд сургуулийг сэтгүүлч мэргэжлээр,
• 2015 онд ШУТИС-д боловсрол судлалын магистр,
• 2018 онд боловсрол судлалын докторант,
• 2023 онд ШУТИС-ийг тээврийн менежментийн магистраар дүүргэжээ.

Өдгөө сэтгүүлч Л.Цэрэнжаргал “Тоншуул.мн” сайтын ерөнхий эрхлэгч, Монголын үндэсний сайтын хөгжлийн нэгдсэн холбооны дэд ерөнхийлөгч, “Хэвлэлийн хүрээлэн”, “Хэвлэл мэдээллийн зөвлөл”-ийн ТУЗ-ийн гишүүнээр ажиллаж байгаа юм.

Гэрэл зургийг Б.Чадраабал