Жирийн л нэг монгол эмэгтэйгээс

Жинхэнэ хайрыг би мэдэрдэг ээ

Хайр гэрэлтүүлсэн тэр эмэгтэйг

Ээж гэдэг....

Н.ЛУТБАЯР-БҮҮВЭЙ ЭЭЖ

Бүтэн нойртой хонож үзээгүй
Бүлээн цайгаа ууж амжаагүй
Ганцхан биений жаргал эдлээгүй ч
Газар дээр миний ээжий

Үр чинь өсөж том болжээ
Үргэлж юунд санаа тавина вэ
Уул шиг том эр болсон шүү дээ
Унтаж амар даа бүүвэй ээжээ

Мөрөөдөл хүслээ биелэнэ гээд
Мөнхийн хутаг хайж явна аа
Цэнхэр тэнгэр шигээ хамт гээд
Цэцгийн шүүдрийг цуглуулж явна аа

Үр чинь өсөж том болжээ
Үргэлж юунд санаа тавина вэ
Уул шиг том эр болсон шүү дээ
Унтаж амар даа бүүвэй ээжээ

Тусад орж том болно гээд
Туурга тусгаарлаж айл болно гээд
өтөл болтлоо харлаа ч гэсэн
өр нэхэлгүй өсгөсөн ээж минь

Үр чинь өсөж том болжээ
Үргэлж юунд санаа тавина вэ
Уул шиг том эр болсон шүү дээ
Унтаж амар даа бүүвэй ээжээ

Үүрдийн санааг чинь ойлгосон ээжээ
Үр хань хоёроо хараад тэр шүү
Хайр тунасан ханийнхаа харцнаас
Хамаг учрыг олж мэдсэн.

ТЭР ЭМЭГТЭЙ – Б.БАТСАЙХАН

Тэр эмэгтэйд би хайртай

Тэвэрч аваад үнсэхэд нь дуртай

Даарсаар очиход минь угтан авч

Бээрсэн гарыг минь бүлээцүүлж өгдөг

 

Гоо үзэсгэлэнт тэр хүнээс

Голт зүрх минь хайр мэдэрдэг ээ

Тэр эмэгтэйд би хайртай

Тэртээ холоос ч угтдагт нь дуртай

 

Халууцсаар очиход минь тосон авч

Хөлсийг минь арчин сэрүүцүүлж өгдөг

Гомдоох ердөө боломжгүй тэр хүнээс

Гоо үзэсгэлэнг илүүтэй мэдэрдэг ээ

 

Жирийн л нэг монгол эмэгтэйгээс

Жинхэнэ хайрыг би мэдэрдэг ээ

Хайр гэрэлтүүлсэн тэр эмэгтэйг

Ээж гэдэг

Б.ЛХАГВАСҮРЭН-ЦЭЦГЭН ЭРХИ

Ээж ээ,

Таны

Цас цагаан гантиг өлмийд тань

Цэцгэн эрхи өргөе гэж

Цэцэг түүлээ,

 

Таны

Сайхан сэтгэлээ олдог байсан номин талаас

Сайн мууг ялгалгүй сэрүүцүүлдэг үүлэн сүүдэр дороос

Эзгүйд минь миний дууг сонсдог

Эрх танхай цэнхэр горхины хөвөөнөөс

 

Цэцэг түүлээ

Цэцэг түүхдээ уйлж түүлээ.

Унасан харууслын нулимс

Оносон цэцэг бүрийг олж түүлээ

 

Тандаа цэцгэн эрхи өргөе гэхэд

Нэгэн зуных байтугай

Нэгэн зууны цэцэгс ч үл хүрэлцэнэ

Сайхан ижий минь

 

Санчигандаа өнчин хяруугүй эх минь

Орчлонгийн үнэн, мөнхийн шөнө дундуур

Одлоо гэж зүүдэллээ.

Одод хийссэн үхлийн хар шуурганд

 

Осголоо гэж хайллаа.

Ээжээ би Таныгаа

Мянган үндэсний үзүүр бүхэнд шингэж

Мандах нарны зүг ургана гэж уужирлаа

 

Энх шаргал үүрээр хиртэшгүй цагаан цолмон болж

Эхлэл бүхний манлайд гялалзанаа гэж тайтгарлаа

Ижий минь та

Хагацлаар чулуужсан аялгуу

Халуунаараа царцсан сүү

Ээжээ би таны үргэлжлэл

 Ц.БАВУУДОРЖ : ЭЭЖТЭЙ ОРЧЛОН

Борлог үүлс шуургалаад эхлэхээр
Бодлын энүүхэнд миний л ижий
Тэрлэг дээлтэй жиндээд ирэхээр
Тэнгэрийн энүүхэнд миний л ижий

Үрлэн мөндөр шуургалаад ирэхээр
Үрий минь дэргэд миний л ижий
Галуун цуваа хошуураад буцахлаар
Галын минь дэргэд миний л ижий

Зүр цэцэг хөлдөөд эхлэхээр
Зүрхний минь дэргэд миний л ижий
Буурал хөгшид цөөрөөд л байхаар
Бурханы минь дэргэд миний л ижий

Алтан дэлхий давчдаад ирэхээр
Аньсага нь чийгтсээр миний л ижий
Хүрэл замлин бүгийгээд ирэхлээр
Хөмсөг нь цантсаар миний л ижий

Анар эрдэнээр барс урлаж
Зүрхэнд нь нуулаа би ижийгээ
Агар зандангаар гарьд бүтээж
Жигүүрт нь нуулаа би ижийгээ

Хаш чулуугаар луу ороож
Аньсганд нь нуулаа би ижийгээ
Халтар арвайгаар арслан сийлж
Алганд нь нуулаа би ижийгээ

Малгайг минь засдаг мутартай л хүн дээ би
Магнайдаа хүргэдэг судартай л хүн дээ би
Сургаал хэлдэг ижийтэй хүн дээ би
Сунаж мөргөдөг тэнгэртэй хүн дээ би

П.БАДАРЧ-ЭХИЙН СЭТГЭЛ

Ижий нь муу хүүгээ үхэж гэж зүүдэллээ

Ийм аймаар зүүд ная наслахдаа зүүдлээгүй

Сааль сүүндээ дэвэлзсэн ч

Санаа сэтгэл дэгэлзсэн ч

Сарних бодлын үзүүрт үр минь торойно

Сайхан шүлэг бичиж гэнэ миний хүү

 

Амьтан хүн уншиж байна

Сайхан дуу зохиож гэнэ миний хүү

Араажаваар дуулж байна лээ

Сайн явна гэнээ миний хүү

Аяны хүн хэлж байна

Муу явна гэнэ миний хүү

 

Амны зугаа ярьж байна

Аль нь ч надад ялгаагүй ээ

Амьд яваа нь л ижийдээ

Алдар чинь шүү дээ

 

Ижий нь хүүгээ

Их санах юм даа

Араг савар хоёроо

Зөрүүлж байж бодлоо

 

Аргал чулуу хоёрыг

Андууран түүж саналаа

Алга аа миний хүү

 

Тэмээ тэмээн цагаан үүлийг

Тэндээ царцтал харлаа

Тэнгэрийн ягаан хаяаг

Цав суутал ширтлээ

Ижийдээ ирсэнгүй ээ

 

Хүний хүү ижийдээ ирж гэнэ ээ

Гол усаар л нэг найр

Наадам болж байна

 

Миний хүү шоронд орж гэнэ

Голыг минь гогодон хэлж байна

Аа яадгийм ороо л биз гэж

Гадагшаа би хүүгээ өмөөрлөө

 

Ам нь цангаж байгаа байх даа

Муу хүү минь гэж

Дотогшоо би өмөлзлөө

 

Гал шиг залуу явахад

Үсэрсэн оч минь юмсан

Ганц бие зандан явахад

Тасарсан навч минь юмсан

 

Алаг бөмбөл эрдэнэ

Алган дээр байна гэж

Зөгнүүлж ирсэн

Ганц хүү минь дээ

 

Алтан бэлзэг газраас олоод

Амандаа үмхтэл залгичихлаа гэж

Зүүдлүүлж олдсон ганц үр минь дээ

Ядаж яваа юм бол миний хүү

Тэнэж яваад юү хийх вэ

Ижийдээ л хүрээд ир!

 

Хүний нүдэнд бол

Хөгцтэй хад шиг

Хөх толгойтой

Хөгшин хүү минь

Ижийнхээ нүдэнд бол

Манцуйдаа тарвалзах

Мяндас цагаан хүү минь

Ижийдээ ир!

 

Хөхөөрөө чамайг даллая

Yхэхээрээ чамайг айлгая

Миний хүү ижийдээ ир!

Ухаантай даа миний хүү

 

Хурай хурай

Унага шиг ижийдээн

Давхиад ир,

Гуруй гуруй.

 

 

 

 

 

 

 

ЭЭЖИЙН ТУХАЙ СЭТГЭЛ БҮЛЭЭЦҮҮЛЭХ ШҮЛГҮҮД