• Өнөөдөр 2024-03-29

Яруу найрагч Х.Чилаажавын “Итгэл” яруу найргийн номоос онцлох таван шүлэг

2022-09-19,   717

Mонголчууд бидний зүрх сэтгэлд үргэлж дуулагдаж байдаг олон сайхан дууны шүлэг бичсэн хүн бол Х.Чилаажав. Тэр дундаа “Хурд” хамтлагийн уран бүтээлийг түүнгүйгээр төсөөлөхөд бэрх. Тиймээс бид Соёлын гавьяат зүтгэлтэн, яруу найрагч Х.Чилаажавын “Итгэл” яруу найргийн номоос онцлох таван шүлгийг уншигч танд хүргэж байна. 

Орчлонгоор нэг хайлаа

Огтхон ч бараа алгаа

Оргүй болждээ гэхээр л

Ойрхоон л байгаад байх юмаа

 

***

Тэртээ алсын бараа

Тэнгэрийн хаяатай нийлээд

Алслах тусмаа цэнхэртээд

Аялгуу болж хувирнам

Тэр аялгууг сонсохоор

Тэнгэр надад сонсогдоно

Тэнд л суугаа

Тэд нар минь бодогдоно.

***

Хорвоод анх төрөөд би

Хонины сүү ууж хүн болсон юм гэнэлээ

Халзан цагаан хонь аятай зан

Хааяа надаас гараад л байх юм даа

***

Намрын гэгэлгэн шувууд

Наанаас чинь ирлээ хайрт минь

Хойтон буцаад очиход нь л

Хоёулаа хамт угтъя даа

Энэ зуны шувууд

Эзгүй хойгуур минь ганганаад

Хөнгөн нимгэн гунигийг чинь

Хөдөлгөж л байсан болов уу даа

Шувуудын ирсэн замаар

Суунаг цагаан манантай

Манан татсан ч чамайгаа

Мартах нь үгүй сэтгэлтэй

Үүлэн цаанаас ч чамайгаа

Үгүйлэн санах бодолтой

Хонгор чамдаа хайртай

Хов багтахгүй зүрхтэй

***

 Уулсын тухай бичихээр л

Тэнгэрийн агуу нь тодрох юм

Уйлсан бүсгүйд үнсүүлснээс хойш

Дурлалын шүлэг зогсохгүй юмаа


Яруу найрагч Х.Чилаажавын “Итгэл” яруу найргийн номоос онцлох таван шүлэг
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2022-09-19 20:10:11
    Erdenebat: ******** shulegch
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188