Английн зохиолч Виржини Вүүлф нь бүх цагийн хамгийн алдартай эмэгтэй зохиолчдын нэг маргаангүй мөн,  XX зууны утга зохиолын сод төлөөлөгч билээ. Хүйсийн тэгш байдал, феминист санааг зохиол бүтээлдээ хүчтэй тусгасан зохиолч билээ. Түүний бүтээлээс онцлох зургаан номыг санал болгож байна.

1. Хатагтай Дэллоуэй- Mrs Dalloway (1925)

“Хатагтай Дэллоуэй” нь  Виржини Вүүлфийн шилдэг бүтээлийн нэг гэгддэг. Кларисса Дэллоуэй нь Английн сэхээтэн гаралтай бүсгүй агаад үйл явдал нь дэлхийн I дайны дараа өрнөнө. Зохиол уншигчдыг дүрүүдийн бодлоор аялуулж, дүрийн дотоод мэдрэмжийг өгүүлэн бичжээ. 2007 онд уг номоор ижил нэрт кино хийгдэж байжээ.

2.  Орландогийн намтар- Orlando: A Biography (1928)

Зохиолч Хорхе Луйс Борхэс уг бүтээлийг “Энэ эриний хүчирхэг бүтээл” хэмээн үнэлж байжээ. Уг зохиол Элизабет I хатны үед амьдардаг гоо үзэсгэлэнт яруу найрагч залуугийн амьдралаар жендер, хүйсийн ойлголтын асуудлыг хөнджээ. Уг зохиолоор 1992 онд ижил нэрт кино бүтээгдсэн ба жүжигчин Тильда Свинтон Орландогийн дүрийг бүтээсэн байна.

3. Гэрэлт цамхаг руу-То the Lighthouse (1927)

Рамсэйн гэр бүлийн гурван гишүүний өнцгөөс олон талт асуудлыг харуулсан энэхүү бүтээлд “Гэрэлт цамхаг” дахь байшинд амьдрах хугацаанд өрнөсөн олон саад бэрхшээлийн талаар гардаг. Зохиолч Виржини Вүүлф өөрчлөлтөөс айх айдсын талаар судалж, дүрийн дотоод хүүрнэлээр бичжээ.

4. Өөрийн гэсэн өрөө- A Room of One’s Own (1929)

Кембрижийн их сургуулийн оюутнуудад “Эмэгтэй ба уран зохиол” нэртэй эсээгээ 1929 онд баяжуулж ном болгон хэвлүүлсэн аж. Уг эсээнд эмэгтэй хүн зохиол бичих тухай болон мөнгөгүй, өөрийн гэсэн  өрөөгүй бол авьяас билэг, бүтээлч санаа гарах боломжтой, эсэх талаар санааг хөнджээ. Жишээ нь Шекспирийн дүү эмэгтэй авьяас билэгтэй, бичихийн төлөө тэмцэж гэмээн амиа хорлоод л дуусах байсан талаар хүйсийн асуудлыг дэлгэн бичсэн.

5. Давалгаа-The waves (1931)

Уг номд зургаан хүний монологоор нийгэм болон бие даасан байдлын талаар бичжээ. Харин долоо дахь хүүрнэгч Персивал маш чухал дүр ч огтоос хүүрнэдэггүй. Уламжлалт хэв маягаас зайлсхийж, яруу найрагтай сүлбэн бичсэнээрээ онцлог.

6. Үйлдлийн хооронд- Between the Acts (1941)

“Үйлдлийн хооронд” ном нь Виржини Вүүлфийн сүүлийн бүтээл юм. Уг номоо хэвлүүлэхдээ шалихгүй бүтээл болох вий гэж тэрбээр санаа зовж байжээ. Дэлхийн II дайны үед Английн нэгэн тосгонд үйл явдал өрнөнө. Уг бүтээлдээ дайны сэдвээр хэд хэдэн чухал санааг дэвшүүлсэн байна.