Монгол Улсын анхны пост панк хэмээн уншигч олонд хэдий нь алдаршсан зохиолч С.Анудар “4 биш 4” гэх ганц номтой. Тэрбээр ардчилал гараад удаагүй Монголд хөлөө олж чадалгүй явсан нийгэмдээ жинхэнэ утгаараа “Соёлын довтолгоо” хийсэн бөгөөд уншигч олонд ч сэтгэлгээний цохилт өгч чадсан гэгддэг. 22 насандаа хорвоогийн мөнх бусыг үзүүлсэн түүнийг өнөөгийн уншигчид философилог бичвэр, этгээд хачин найруулгын арга барил, сонгодог авангард шинжүүдээр нь сайн мэднэ. Түүний рок хөгжмийн үзэл санааг утга зохиолтой нэгтгэн нийлүүлсэнд хэн бүхэн талархдаг биз ээ. Өнгөрсөн 10 жилийн хугацаанд түүний бүтээсэн “4 биш 4” номыг эрж, сураглах уншигч, сонирхогчид олширсон.

Харин өнгөрсөн жил түүний 46 жилийн ойг тохиолдуулан зохиолч С.Анударын нэрэмжит “Тэг” наадмын эцсийн дүн гарахтай зэрэгцээд “4 биш 4” ном нь дахин хэвлэгдсэн билээ. Уг үйл явдал нь утга зохиолд элэгтэй уншигч бүрийн баяр болсон гэхэд хилсдэхгүй. 4 биш 4 номын талаар зохиолч С.Анударын эгч С.Гэрэл “Дүүгийн минь номыг асууж, сураглах залуус олширч улмаар дахин хэвлэхээр болсон. Үүнд ч би маш их баяртай байгаа. 4 биш 4 номыг АНУ-ын нэгэн иргэн англи хэл дээр орчуулж хэвлэхэд бэлэн болгосон байсан. Харин коронавирусийн цар тахлын улмаас хойшлогдсон. Энэ талаар одоохондоо мэдээлэл хүлээж аваагүй байгаа ч энэ сард АНУ-д нээлтээ хийх ёстой.

Мөн би дүүгийнхээ номыг франц хэл рүү хөрвүүлж байгаа. Үнэндээ энэ номын философи утга санааг хадгалж бичихэд их хэцүү. Дүүгийн маань бичиж үлдээсэн, энэ номон дээрх өгүүллэгүүдээс өөр бичвэрүүд нь мөн хадгалагдаж байгаа. С.Анударын бичгийн хэвийг тайлж, уншихад ярвигтай, хэцүү ажил” гэв. Дөрвөн өгүүллэг бүхий номоор түүнийг утга зохиолд хайртай хүмүүсийн сэтгэлгээнд томоохон цохилт өгч чадсан гэж уншигчид дурсах нь олонтаа. Зохиолч С.Анударын “4 биш 4” номд багтсан бүтээлээс зохиолч, яруу найрагч Г.Аюурзанын эрхлэн хэвлүүлсэн “Монголын сонгомол өгүүллэг” номд “Бүх юм” өгүүллэг, “Монголын уран зохиолын дээжис 108” ботийн 104 дүгээр ботид “Ядаж чад, тэгээд” өгүүлэг, Төрийн шагналт, Соёлын гавъяат зүтгэлтэн, зохиолч Д.Батбаяр болон зохиолч Л.Дашням нарын эрхлэн гаргасан “Монголын өгүүллэг туужийн дээж” ботиудийн зургаа дахь ботид “Бүх юм”, “Ядаж чад, тэгээд” зэрэг өгүүллэг нь хэвлэгдэн гарч байжээ. Түүний бичиж үлдээсэн бүтээлүүд нь өөр нэгэн ном болон хэвлэгдэж, уншигч түмний гарт хүрэх цагийг хүлээх л үлджээ.