Төрийн соёрхолт яруу найрагч Р.Чойномын нэрэмжит “Залуу нас” дугуйлангийн гишүүн, залуу яруу найрагч О.Оргилсайханы “Миний зүгт ниссэн шувуу” шинэ номыг уншигч та бүхэнд танилцуулж байна.

Залуу яруу найрагч О.Оргилсайхан 1997 онд Завхан аймгийн Тосонцэнгэл суманд төржээ. Тэрбээр Зэвсэгт хүчний 326 дугаар ангид хугацаат цэргийн алба хааж, их зохиолч Д.Нацагдоржийн нэрэмжит УЗНАДС-ийг утга зохиолын ажилтан мэргэжлээр дүүргэсэн байна. Эрх бага наснаасаа хайрлаж, дурласан утга зохиолыг бага ахуй, цэрэг, оюутан насны дурсамжтайгаа холбон өөрийн гэсэн яруу найргаа бүтээсэн түүний шүлгүүдээс “залуу нас үнэртэнэ”.

“Миний зүгт ниссэн шувуу” номын талаар яруу найрагч Л.Лхагвасүрэн “Анхны бүхэн сайхан байдаг. Алдаа оноотой байсан ч анхных гэж үгүй бол түүнээс цааш хөврөх боломжгүй билээ. Ийм л догдлол дүүрэн тань руу нэгэн шувуу нисэж байна” хэмээн тодорхойлжээ. Ийнхүү уншигч та бүхэнд залуу яруу найрагч О.Оргилсайханы “Миний зүгт ниссэн шувуу” номоос гурван шүлэг хүргэе.

МИНИЙ ЗҮГТ НИССЭН ШУВУУ

Миний зүгт ниссэн шувуу уйлах ч үгүй дуулах ч үгүй байхад

Чиний зүгт ниссэн шувуу яагаад уйлмаар дуулдаг юм бэ

НААДМААС БУЦАГСАД

Наадмаас буцагсад

Чуулсан оддын зүг явна.

Цугларсан морьд нь

Цулбуураа шаралтал зажилчихсан

Намрын уйтай ирнэ.

Наадмаас ирэгсэд

Толгодын зүг явна.

Хөтөлсөн морьд нь

Өвсийг шарлатал зажилчихсан

Өвсний зовлонтой ирнэ.

Наадмаас ирэгсэд

Морьдоо хөтөлчихсөн

Морьд нь цулбуураа зажилчихсан

Өвсний нүдийг уруулаараа тэмтрээд

Нулимстай ирнэ.

НОЙР ДҮҮРЭН ЦАС ОРЖЭЭ

Нойр дүүрэн цас оржээ.

Нойронд минь чи нүцгэрсээр одно.

Дэр дүүрэн цас оржээ.

Дэргэд минь чи чимээгүйхэн бүдгэрнэ.

Ийм цагаахан шөнийг чи надад үлдээж

Цаг хугацаа сэрэхээс нь өмнө арилжээ.

Сэтгэл дүүрэн цас оржээ.

Сэтгэлд минь чи уйлж хоцорно.

Нүд дүүрэн цас оржээ.

Нүдэнд минь чи элэгдэж хорогдоно.

Ийм дулаахан шөнийг чи надад үлдээж

Цаг хугацаа эхлэхээс нь өмнө арилжээ.

Амьсгал дүүрэн цас оржээ.

Алганы минь хээ тодрох юм.

Агаар дүүрэн цас оржээ.

Шувууд л мөрөө үлдээж нисэх юм.

Ийм арилшгүй шөнийг надад үлдээж

Цаг хугацаа ирэхээс өмнө чи мэндэлжээ.