Энэ удаагийн “Оюунт Монгол” буланд хөгжмийн зохиолч Э.Шүтээн өөрийн онцлох 10 жазз уран бүтээлчийг нэрлэлээ.

Гэрэл зургийг: Ralf Dombrowski

1.Maria Schneider- Choro Dancado

Тэрбээр Грэммийн олон удаагийн шагналтан хөгжмийн зохиолч билээ. Миний хувьд энэ цаг үеийн хамгийн шилдэг эмэгтэй жазз хөгжмийн зохиолч гэж хүндэлдэг. Мөн миний уран бүтээлд ч түүний нөлөөлөл их бий.

2. Brad Mehldau- Striving After Wind

Орчин үеийн жазз төгөлдөр хуурт хамгийн үнэ цэнэтэй, олон шинэчлэлт авчирсан уран бүтээлч гэж би боддог. Би хоёр удаа тоглолтыг нь амьдаар нь үзэж байсан юм. Тухайн үед зааланд авчирч байгаа уур амьсгалыг үгээр тайлбарламгүй байсан.

3. The Thad Jones/Mel Lewis Jazz Orchestra- To You

Трубачин Тад Жонес болон бөмбөрчин Мэл Левис нарын 1965 онд үндэслэгдсэн жазз оркестра юм. “Live in Munich” альбомоороо Грэммигийн шагнал хүртэж байсан. Мэл Левисыг нас барснаас хойш одоо бол “Vanguard Jazz Orchestra” нэрээр уран бүтээлээ туурвиж байна. Хөгжмийн зохиолчийн хувьд миний хувьд тэдний найруулга сурах материал их бий.

4. Christian Elsässer - 7 in 7

Кристиан бол миний жазз төгөлдөр хуур, хөгжмийн зохиомжийн мэргэжлийн багш, нэг ёсондоо миний Мюнхенд сурах болсон шалтгаануудын нэг. Германы одоо цагийн залуу хөгжмийн зохиолчдын хамгийн том үлгэр жишээ бүхий уран бүтээлч. Европын хамгийн алдартай олон том хамтлаг, оркестра-д хөгжмийн найруулагч, хөгжмийн зохиолч, удирдаач хийдгээс гадна өөрийн гэсэн жазз хамтлагтай. Уран бүтээлтэй нь хамгийн ойроос танилцах, ярилцах боломжтой байгаа маань хэцүү цаг үед хөгжим бичих урам зориг болж байна.

5. Mary Lou Williams-the Zodiac suite

5. Мэри Лоу Уильямс бол хамгийн анхны эмэгтэй жазз төгөлдөр хуурч, хөгжмийн зохиолчдын нэг. Эмэгтэй жазз хөгжимчид ерөнхийдөө харьцангуй бага байдаг учраас би хувьдаа маш их хайрлаж хүндэтгэдэг. Өөрөө эмэгтэй жазз хөгжимчний хувьд үлгэр жишээ авч чадах эмэгтэй уран бүтээлчтэй байх гэдэг нь маш чухал шүү дээ.

6. Mccoy Tyner- Passion Dance

Тэрбээр модал жазз урсгалд хамгийн нөлөө авчирсан төгөлдөр хуурчдын нэг. Би ядарсан үедээ эсвэл, гараас юу ч гарахгүй үед тухайн үеийн цомгуудыг сонсож эрч хүчээ сэргээж авдаг.

7. Kenny Wheeler- The Long time ago suite

Долоон жилийн өмнөхөн нас барсан Канадын алдарт трубачин, хөгжмийн зохиолч билээ. Агуу хөгжимчин байхын гадна хөгжмийн зохиолчийнхоо хувьд хойч үедээ сурч дуусахгүй маш их материал үлдээгээд буцсан гэж боддог.

8. Wayne Shorter - Speak no evil

Энд бичсэн ихэнх уран бүтээлчид ихэвчлэн орчин үеийн талдаа болчих шиг боллоо. 1960-аад оны үед бичигдсэн үнэт эрдэнэсүүдийн нэг.

9. Keith Jarrett- the koln concert

Хамгийн анх сонсож байсан, жазз хөгжим суръя гэж хүсэхэд хүргэсэн бүтээл. Энэ зохиолыг анх сонсголоороо эхнээс нь дуустал гаргаж, тоглож сурч байлаа. Тийм ч учраас миний хувьд маш их үнэ цэнэтэй.

10. Gerald Clayton - Happening: live at the village vanguard

Энэ жилийн Грэмми шагналд нэр дэвшсэн цомог. Жералд миний хамгийн дуртай залуу, орчин үеийн жазз төгөлдөр хуурчдын нэг. Сүүлийн үед энэ цомгийг нь ойр ойрхон их сонсож байна.